Makietie in beeld
Mosselbaai is trots die Kwêla Dorp van die Jaar 2017 en by die groot Makietie, geborg deur kykNET, is die afgelope naweek behoorlik feesgevier. Dis boonop nie elke dorp wat twee keer in die bestek van 10 jaar hierdie voorkeurtitel losslaan nie. In 2007 het Mosselbaai met die Rapport Dorp van die Jaar-titel gespog.
Die kykNET Kwêla- span het met twee produksiespanne Mosselbaai voor en tydens die fees verfilm onder meer vir insetsels tydens die Kwêla- uitsending van 22 Oktober, asook vir ‘n reklameflits wat Mosselbaai op kykNET as Dorp van die Jaar 2017 sal bemark. Kwêla- aanbieder Therese Benade het aan die Mossel Bay Advertiser gesê die verfilming het baie goed verloop, en sy het haar dank teenoor Kobus Crous van Mossel Bay Helicopters uitgespreek wat die filmspan Saterdagmiddag vir ‘n panoramiese uitsig oor die dorp en omgewing met ‘n helikoptervlug verras het. Die gratis fees het Saterdagoggend afgeskop met die Moss March, waarmee die jaarlikse Mosselbaai Sport- en Rekreasiefees ten einde geloop het.
Daarna was dit tyd vir eindelose pret met uithalervertonings op die verhoog, ‘n speelpark vir die kleingoed, ‘n valskermvertoning en heerlike verversings by die talle stalletjies en die Rotariërs se biertent.
Die stalletjies kon boonop gratis hul ware tydens die Makietie bemark. Boonop het ‘n aantal akteurs van die kykNET TV-reeks Suidoosteraanhangers verras en talle het die kans benut om foto’s saam met hul gunstelingkarakters te laat neem.
Volkspele deur die Eendragvolkspelelaer en plaaslike kunstenaarstalent soos Angeline’s Dance Academy en die 2017-wenners van die Mossel Bay’s Got Talent-kompetisie het vir ‘n heerlike, feestelike gees gesorg. Die Mocca-vertoning het onder meer optredes ingesluit soos die gewilde Indwe-skoolkoor, Mordegai Erasmus, Herbie Michaels en die Mossel Bay Gumboot Dancers.
Sinoniem met Mosselbaai, was die pittige, onnadoenbare vertoning van Aunty Ethel soos gewoonlik weergaloos. Chelsea Wales, Ambrosia Muller, G-Minor, Sunel, Tanja Storm, lede van die Dynamic Dance Studio, die Prerogative-groep wat Keenan Daniels en Alicia van Wyk ingesluit het, het die groot gehoor vasgenael gehou ondanks die koue.
Groot kannone in die die vermaakbedryf het Mosselbaaiers tot laat laat kuier. Optredes deur Willem Botha, Pieter Koen, Emo Adams, Early B en The Voice- wenner Craig Lucas, wat vroeër die middag nog die volkslied by die Springbokke se wedstryd op Nuweland gesing het, het die groot gehoor meegesleur tot en met die laaste note waarmee die Makietie afgesluit is.