Huiskwessies toegelig
Uitbreiding 13 en Proteapark se inwoners het met 407 handtekeninge op twee afsonderlike griefskrifte en sterk bewoorde openbare besware tydens ‘n gemeenskapsvergadering onomwonde nee gesê vir die munisipaliteit se voorgestelde tydelike oorgangshervestigingsgebied in hul area. Uiteindelik is gemeenskapsleier Jerome Meyer se voorstel aanvaar en het die gemeenskap aan wyksraadslid Rosina Ruiters ‘n mandaat gegee om Mosselbaai se raad in te lig dat Uitbreiding 13 en Proteapark ‘n tydelike oorgangshervestigingsgebied absoluut weier. Ruiters is gevra om die gemeenskap in te lig wanneer dié mosie voor die raad dien sodat die hulle die raadsvergadering kan bywoon.
‘Nie hier nie’
Tientalle gemeenskapsleiers en sprekers het op Donderdagaand, 8 Februarie sterk standpunt ingeneem tydens ‘n vergadering waar ‘n afvaardiging van die munisipaliteit na hul menings oor die planne as deel van die openbare deelnameproses geluister het en die insette genotuleer is.
Wyksraadslid Rosina Ruiters het die openbare terugvoervergadering belê. Sy het ook gewys om die skrywe van die burgemeester wat die gemeenskap aanmoedig om aan die openbare deelnameproses deel te neem.
Volgens die munisipale direkteur van beplanning en geïntegreerde dienste, Carel Venter, is daar planne om die sowat 3 100 gesinne in die 21 informele nedersettings in die groter Mosselbaai op gedienste erwe te vestig.
“Die voorgestelde projek sal deur die nasionale regering befonds word en bestaan uit gemerkte, gedienste erwe, hoewel dit nie onmiddellik van topstrukture (huise) voorsien sal word nie,” aldus Venter.
“Hoewel die munisipale raad die projek goedgekeur het, volg die openbare deelnameproses nou om die gemeenskappe wat deur die planne geraak word se menings daaroor te bekom.”
Venter het bygevoeg dat die departement omgewingsake sedertdien planne vir ‘n oorgangshervestigingsgebied direk aangrensend aan Proteapark afgekeur het omdat bedreigde spesies op die grond voorkom. ‘n Ander area, nader aan die oorlaaistasie word dus as meer geskikte perseel oorweeg.
Gebore Mosselbaaiers
Die onderskeie sprekers het skerp beswaar gemaak teen enige planne vir ‘n tydelike oorgangshervestigingsgebied. Hulle het wel die bestaande, bewese gebrek en behoefte aan behuising vir die huidige mense van Wyk 13 benadruk. Daar is heftig aangedring dat ontwikkeling van behuisingprojekte vir gebore Mosselbaaiers, wat jare reeds op die behuisingswaglys is en waarvan talle in agterplase moet woon, eerste prioriteit behoort te geniet. Inwoners meen dis onregverdigbaar dat ‘n oorgangshervestigingsgebied vir hul onmiddellike area beplan word terwyl hul bewese behoefte aan behuising nie dieselfde sin vir dringendheid geniet nie.
Vrese
Baie besware het vrese verwoord dat die tydelike oorgangshervestigingsgebied in ‘n onbeheerde, permanente plakkerskamp sal ontwikkel. Kommer bestaan dat geen ag geslaan word nie op die sosio-ekonomiese en veiligheidsimplikasies vir die betrokke inwoners sou plakkery toegelaat word.
Spreker ná spreker het verwys na vrese oor veiligheid en het die munisipaliteit uitgedaag om die impak van misdaadstatistiek vir die area te ontleed, veral vir die tydperk sedert die Drie Susters-ontwikkeling - teen die sin van die gemeenskap - nogtans gevestig is.
“Baie van ons het ons huise deur banklenings gekoop. Ons het investeer, ons betaal dienste en belastings, nou word die waarde van daardie beleggings bedreig. Ons kinders kry geen voordele nie. Mense wat ongeorden kom plak kry voorkeur bo mense wat hier gebore is.
Bekostigbare huise
Direkteur Venter het benadruk dat die grond tussen Mikeva en die DBV geoormerk is vir bekostigbare, behoorlike ekonomiese behuisingsprojekte en gesê die planne daarvoor is in ‘n gevorderde stadium.
Sommige inwoners het egter na vroeëre voorgenome bekostigbare behuisingsprojekte verwys wat sedertdien tot niks gekom het nie. Verskeie kere is gevra waarom grond juis in Uitbreiding 13 en Proteapark vir die oorgangshervestigingsgebied geoormerk is, en hoekom grond in areas soos Hartenbos, Danabaai of Voorbaai nie as alternatiewe oorweeg word nie?
Politiek
Inwoners het onbedekte dreigemente na die politieke bestel gemik. Boonop is gewaarsku dat ‘n belasting en dienstegeldboikot sal volg sou hul besware nie ter harte geneem word nie. Foto’s: Nickey le Roux