NI-student beseer in botsing by kollege
‘n N1-student in sweiswerk aan die Suid-Kaap Kollege in Mosselbaai is vandeesweek per ambulans na ‘n plaaslike hospitaal geneem nadat sy voertuig in die sekuriteitskompleks by die toegang na die kampus vasgejaag het.
Volgens ooggetuies het dit voorgekom asof die student waarskynlik ‘n floute beleef het oomblikke voordat sy voertuig in die gebou vasgejaag het.
Die studente het die ongelukslagoffer as ‘n vriendelike, fikse jong man beskryf.
Mosselbaai-munisipaliteit se brand en rampbestuursdienste se personeel was eerste op die toneel om die ongelukslagoffer te behandel en is bygestaan deur nooddienspersoneel van die munisipale verkeersdiens, die onderskeie ambulansdienste en die SA Polisie.
‘n Verteenwoordiger van die kampus het bevestig dat die jong man ‘n ingeskrewe student is.
Sy mede-studente het beweer dat hy oorspronklik van Oudtshoorn is.