Man derduisende kwyt oor hond
'n Australiese man wat in Hartenbos woon het nou glo derduisende rand betaal vir 'n Franse bulhond wat hy steeds nie ontvang het nie, in een van die jongste internetbedrogsake wat deur die Da Gamaskop-polisie ondersoek word.
Volgens inligting verskaf deur die Da Gamaskop-polisie, het die man glo reeds nege keer inbetalings gedoen. Die totale bedrag wat die man tot dusver kwyt is, beloop bykans 'n R100 000. Volgens kapt Wollie Fourie, kommunikasiebeampte van die Da Gamaskop-polisie, duik daar al hoe meer misdaad van hierdie aard op wat by die stasie aangemeld word.
"Ons maan die publiek weer eens om uiters bedag te wees wanneer hulle reageer op advertensies op die itnernet en aanlyntransaksies doen. Moenie goedsmoeds geld oorbetaal sonder om seker te maak dat dit wat jy koop, wel aan jou gelewer gaan word nie."
Die Mossel Bay Advertiser het vandeesweek met die klaer in verbinding getree om na besonderhede van die bedrogspul te verneem, maar hy het verkies om nie 'n onderhoud toe te staan nie.
* Lees ook die artikel deur prof Rossouw von Solms, semi-afgetrede professor van die Nelson Mandela Universiteit in Port Elizabeth aangaande kubersekerheid op bladsy 24.