Soos vinkel en koljander teen misdaad
Patrolliewerk en flinke selfoonkommunikasie deur buurtwagte het verlede naweek tot die in hegtenisneming van twee huisbraakverdagtes gelei en het ook voorkom dat skelms op OTM's in Mosselbaai toeslaan.
Tydens die eerste voorval op Vrydag, 9 Februarie, het die polisie op GrootBrakrivier hul hande vol gehad met verskeie huisbraakpogings in Glentana. Nagskoflede ao Gerhard Craus en ao Leon van der Mescht het die gebied deurnag gepatrolleer. Buurtwaglede is ook van die misdrywe in kennis gestel en het saam met polisie die gebied vir enige verdagte optrede dopgehou. Teen sonopkoms op Saterdag, 10 Februarie het die dagskof by ao Craus en ao Van der Mescht oorgeneem en die patrollies hervat.
Volgens die polisiewoordvoerder, sers Chantel Marais het die polisiebeamptes die N2 gepatrolleer toe hulle op 'n BMW X3-nutsvoertuig langs die pad afkom. Die beamptes het die voertuig genader waarna een passasier daarin kon slaag om weg te hardloop.
"Die ander passasier en die bestuurder is op die toneel in hegtenis geneem nadat die voertuig deursoek is."
Volgens sers Marais is beslag gelê op twee televisiestelle, 'n dvdspeler en ander gesteelde items wat in die voertuig was.
'n Twee-en-veertigjarige en 'n 31-jarige man is in hegtenis geneem en aangekla van diefstal en die besit van gesteelde goedere. Volgens sers Marais is beide verdagtes van George afkomstig. Die verdagtes het die naweek in aanhouding spandeer en het op Dinsdag, 13 Februarie in die landdroshof op Groot-Brakrivier verskyn.
Die polisie is steeds op soek na die verdagte wat weggehardloop het. "Ons volg tans positiewe leidrade op en sal binnekort 'n verdagte in hegtenis neem."
OTM-rooftogte
Die Onderdorp- en Heiderand-buurtwagte op Mosselbaai het op Vrydag, 9 Februarie 'n boodskap van die polisie ontvang om op die uitkyk te wees vir verdagtes wat vroeër die week by OTM-rooftogte in George en Groot-Brakrivier betrokke was.
Volgens die voorsitter van die Bodorpbuurtwag, Leon van Dyk, is 'n boodskap op al die buurtwag-selfoongroepe versprei. "Om 17:12 het 'n lid van die Onderdorp-buurtwag die verdagte voertuig in Blandstraat gesien. Die insittendes het ook aan die beskrywing van die polisie voldoen. Alle lede is ingelig."
Om 20:00 het 'n lid van die Heiderandbuurtwag die voertuig by 'n vulstasie naby Heiderand opgemerk waarna 'n boodskap weer eens aan alle lede gesirkuleer is.
Volgens Van Dyk het die polisie en buurtwaglede patrollies voortgesit en die voertuig in KwaNonqaba opgespoor. "Die insittendes het egter gevlug." Te danke aan die buurtwagte se paraatheid is 'n moontlike OTM-rooftog in die gebied verhoed.
Buurtwagte van die Onderdorp, Bo-dorp, Heiderand, Da Nova en Tarka is in die proses om 'n beheerkamer en noodsentrum op die been te bring. Befondsing word egter benodig.
Enigiemand wat belangstel om deel van die projek te wees kan Martie Loubser (071 514 4501) of Leon van Dyk (082 651 6228) kontak.
Te danke aan die buurtwagte se paraatheid is ‘n moontlike OTMrooftog in die gebied verhoed.