Vordering met bekostigbare huise
Die Mosselbaai-munisipaliteit se finale beplanning vir die oprigting van meer as 1 300 formele wooneenhede om in die groeiende behuisingsnood van onder meer diegene op die behuisingswaglys en veral aan agterplaasbewoners te voorsien, is in ‘n gevorderde stadium.
Na verwagting sal die detailbeplanning vir die projek teen einde Junie afgehandel wees. As deel van die omgewings- en grondgebruikgoedkeuringproses word ‘n omvattende openbare deelnameproses nou gevolg om onder meer die impak van die voorgenome ontwikkeling op die omgewing en gemeenskappe te analiseer. Na raming sal die projekkoste tussen R250 en R350 miljoen beloop.
‘n Nuwe behuisingsontwikkeling op die grond tussen die DBV en Mikeva langs Louis Fourieweg sal uit drie verskillende konsepte bestaan en deels deur die WesKaapse provinsiale departement van menslike nedersettings en die nasionale departement van menslike nedersettings befonds word. Dit sal behuising voorsien vir beide privaat eienaarskap en/of ‘n opsie om te huur, afhangende waarvoor aansoekers kwalifiseer of aansoek doen.
Die Mosselbaai-munisipaliteit het pas met ‘n openbare deelnemeproses begin om insette oor die voorgenome ontwikkeling, wat as katalisator vir geïntegreede behuisingsontwikkeling in die groter Mosselbaai geag word, te bekom.
Eerste konsep
Die eerste gedeelte sal bestaan uit ‘n sosiale behuisingsprojek van ongeveer 300 staatsgesubsidieerde huureenhede wat beskikbaar sal wees vir inwoners met ‘n familie-inkomste van R3 500 of meer. In hierdie geval hoef die begunstigde nie te kwalifiseer vir ‘n huisverband nie.
Die wooneenhede sal bestaan uit netjiesafgewerkte tweeslaapkamer-woonstelle. Die finale ontwerp daarvan is nog nie beskikbaar nie, maar soortgelyke wooneenhede wat reeds opgerig is in groter sentra maak wel voorsiening vir motorstaanplekke, sommige met skadunetafdakke. Hierdie projek sal geadministreer en beheer word deur ‘n sosialebehuisingsmaatskappy wat die woonstelle sal besit en die huur sal hef en invorder. Die sosialebehuisingsmaatskappy sal deur die nodige bodprosesse deur die munisipaliteit en die department van menslike nedersettings aangestel word.
Tweede konsep
Die strategie van Breaking New Ground (BNG), die term wat gebruik word om na die tweede konsep van die ontwikkeling te verwys, wil ‘n geïntegreerde samelewing te bevorder deur gehaltebehuising binne ‘n subsidiestelsel vir verskillende inkomstegroepe te ontwikkel.
Die sowat 800 wooneenhede in die tweede konsep sal bestaan uit vier tot agt woonstelle per blok wat ‘n gesamentlike oop ruimte sal deel.
Dié ontwikkeling is gemik op inwoners wat tot soveel as R3 500 per maand per familie verdien en eienaarskap van hul wooneenhede wil bekom. Elke woonstel sal ‘n leefarea, kombuis en badkamer op een vlak, met slaapkamers op ‘n volgende vlak behels.
Derde konsep
Volgens die finansies-gekoppelde individuele subsidieprogram (FLISP) sal kwalifiserende huishoudings ‘n eenmalige subsidie op ‘n privaat verbandfinansiering deur ‘n erkende bank verkry om vir die eerste keer ‘n residensiële eiendom te bekom. Kwalifiserende kopers moet R3 500 en meer per maand per gesin verdien en kan die eenhede koop wat volgens standaard huisplanne binne beperkte keuse en volgens bekostigbaarheid op gedienste erwe opgerig word, mits hulle vir ‘n banklening kwalifiseer.
Hierdie eenhede sal deur die betrokke kontrakteurs opgerig en aan voornemende kopers bemark word.
Die finale projek sal saamgevat word deur landskappering wat sal volg. Voorsiening sal ook gemaak word vir openbare oop ruimtes en areas waar besighede en ander sosiale aktiwiteite bedryf sal kan word.