Blokkasies kos belastingbetaler
Mosselbaai-munisipaliteit doen ‘n beroep op alle inwoners in die groter Mosselbaai-omgewing om onwettige storting van afval aan te meld, om te herwin en nie rommel in woonbuurte te strooi nie. Die munisipaliteit spandeer jaarliks baie geld, mannekrag en tyd aan die verwydering en skoonmaak van stormwaterpype, dreine, ensovoorts wat verstop as gevolg van rommel wat daarin gestrooi word wat blokkasies veroorsaak. Die afloop langs Bakke/Walvisstraat wat stormwater opvang vanaf D’Almeida is onlangs deur ‘n motorband verstop wat moontlike oorstromings van Nautilus se parkeerarea asook die Bakke /Louis Fouriekruising kon veroorsaak het, indien dit nie aangemeld en die band dadelik deur die munisipaliteit verwyder was nie.
Groot uitdaging
Die stort van afval en veral groot voorwerpe in stormwaterpype bied 'n groot uitdaging vir die munisipaliteit wat miljoene rand jaarliks moet uitgee aan die skoonmaak en verwydering van vullis uit die stormwaterpype en dreine om onder meer oorstromings te voorkom. Groot voorwerpe, selfs motorbande wat in stormwaterpype gegooi word, bemoeilik die taak om die stormwaterpype behoorlik te laat funksioneer en kan groot skade aanrig. Inwoners betaal telkens vir die herstelwerk, wat derduisende rand kan beloop.
Aslapark is een van die areas waar die grootste probleem voorkom met verstopte stormwaterpype. Dit blyk dat die gemeenskap hier meer as gereeld voorwerpe en vullis in stormwatermangate stort.
"Daar bestaan gevolglik 'n behoefte om meer gereeld bewusmaking te doen van besoedeling en die newe-effekte daarvan op die omgewing en mense," aldus die munisipale woordvoerder, Colin Puren.
Om blokkasies of probleme met stormwaterlyne aan te meld, kontak 044 606 5000 or stuur ‘n e-pos na admin@ mosselbay.gov.za