Afmaak van bome ontstig
Omgewingsbewustes het onthuts reageer toe 'n privaatkontrakteur Woensdagmiddag digby Laerskool Park inheemse waterbessiebome afgemaak het.
Volgens die munisipale woordvoerder, mnr Colin Puren, is die bome gesnoei om die padveiligheidsituasie vir ouers en leerders by die laerskool te verbeter. "Daar word ‘n groet-en-ry-fasiliteit geskep. Ouers kan soggens daar stop en leerders aflaai en dan dadelik weer vertrek. Indien nodig, kan hulle parkeer om hul klein kinders na die skoolhek te vergesel. Smiddae kan daar op ‘n veilige wyse geparkeer word," aldus mnr Puren.
Die fel kritiek op die afmaak van die bome spruit volgens lesers uit kommer dat bome voor die voet uitgeroei word sonder dat in die ontwerpstadium van die projekte ag geslaan word of die bome behoue kan bly of nie.
"Daar steek geen waarheid in beweringe dat die bome baie mors nie, dit sou die munisipaliteit geloon het om met omgewingsbewustes, en nie net hul eie amptenare van die parke-afdeling nie, te konsulteer.
"Die munisipaliteit moet uitgedaag word om te bewys net hoeveel bome deur die plaaslike owerheid aangeplant word in die plek van die gevalle waar volgroeide bome ter wille van sogenaamde ontwikkeling afgemaak word," sê lesers wat hul misnoë met die verwydering van die bome teenoor die Mossel Bay Advertiser uitgespreek het.