Polisie in verenigde front teen middelmisbruik
Lede van verskeie plaaslike polisiestasies het vandeesweek kragte saamgespan tydens optredes teen drank- en dwelmmisbruik in die groter Mosselbaai. Die lede, verteenwoordigend van die polisie op Groot-Brakrivier, asook die KwaNonqaba-, Mosselbaai- en Da Gamaskop-polisiestasies, in samewerking met die Langeberg K9 honde-eenheid, het onder leiding van lt kol Chris Meiring opgetree.
“Die gemeenskap word daaraan herinner om die polisie behulpsaam te wees in die stryd teen dwelm- en drankmisbruik. Rapporteer oortreders en onwettige handelaars. Die polisie is daar om die gemeenskap te beskerm en te dien. Groot belonings is beskikbaar vir persone wat die polisie van inligting voorsien wat lei tot die opspoor van dwelmhandelaars en diegene wat onwettig in drank handel,” sê kapt Wollie Fourie, kommunikasiebeampte van die Da Gamaskop-polisie.