Vrot reuke - groter Mosselbaai
Willem Hanekom, skryf:
Ek verwys graag hiermee na die berig in die jongste Advertiser oor bogenoemde.
Meer as een jaar gelede het ek 'n brief geskryf aan die geagte munisipaliteit oor die jarelange onwelriekende reuk wat dikwels opduik by die pompstasie in Voorbaai.
Die betrokke amptenaar het toe 'n lang tegniese verduideliking aan my op skrif gestel waarin hy verduidelik dat sekere werk gedoen is, maar verdere aandag nog daaraan geskenk sal word ten einde die posisie te verbeter.
Dit stink nog steeds daar en die werknemers daar kla en kla by munisipaliteit. 'n Amptenaar het onlangs aan my genoem hy weet nie van enige ruike wat nog daar bestaan nie... bid jou aan.
Die rede vir hierdie skrywe is dus slegs:
Daar word berig oor ruike wat bestaan oor 'n wye area, maar die ergste op ons voorstoep word verswyg? Is sommige mense in die media ook nie bewus van daardie reuk nie?
Dit sit besoekers/toeriste erg af en kan 'n gesondheidsgevaar skep vir die naby werknemers.
Kontak gerus die volgendende persone vir eerstehandse verwysings: Radie Loubser by Volkswagen en Riaan Vermeulen van Sanlam Blou Ster.
Kommentaar:
Die leser is per brief op 19 Januarie breedvoerig deur die Mosselbaaimunisipaliteit ingelig oor die inisiatiewe om lugsuiwerheid by die betrokke probleemarea te verseker. Onder meer is 'n 'Bio-Tricklink Odour Filter'-sisteem spesifiek geïnstalleer om die jarelange reukprobleem aan te spreek. Na 'n verdere klagte op 19 Januarie het munisipale amptenare ter plaatse ondersoek gedoen en is kontakbesonderhede by besighede gelaat sodat probleme onmiddellik aangemeld kan word.
Die munisipaliteit het ook met die Eden-distriksmunisipaliteit ooreengekom dat 'n spesiale instrument beskikbaar gestel sal word om oor 'n sekere periode gasse, wat tot onaangename reuke aanleiding mag gee, te monitor. Die leser is ingelig dat hierdie instrument tans in Kanada is, maar gebruik sal word om te bepaal of enige verdere aksie geneem moet word.
Enige persoon wat onaangename reuke in die area opmerk, word genooi om die munisipaliteit (044 606 5000) te kontak sodat dit onverwyld aangespreek kan word.