Gorries op ‘n galop terwyl matrieks spog in styl
Die jaarlikse Metropolitan-perderesies by Hoërskool Punt het op Vrydag, 2 Februarie plaasgevind en volgens die tradisie, was die matrieks uitgevat in spoggerige uitrustings terwyl die Gorries, oftewel graad 8-leerders die vermaak moes verskaf.
Soos by alle goeie en gesofistikeerde perdewedrenne, was daar geen tekort aan toeskouers nie en ouers, onderwysers en die res van die leerders het die deelnemers luidkeels aangemoedig.
Aan kreatiwiteit was daar geen tekort nie en die dogters se hoedeskeppings was werklik iets besonders. Die manne se “perde” het ook geensins teleurgestel nie en het flink en vinnig deur die hindernisse gehardloop.
Op ‘n romantiese noot het Damiane Scott vir Lizelle Oosthuizen voor almal teenwoordig gevra of sy hom na die matriekafskeid sal vergesel en natuurlik kon sy nie nee sê nie.
Ten spyte van ‘n woeste wind wat die hoedeskeppings so bietjie rondgewaai het, het al die verrigtinge in ‘n goeie en gesellige gees plaasgevind en kon die perderuiters en modelle uiteindelik tot rus kom.