Mosselbaaiers presteer by padfietskampioenskap
Die beste fietsryers van oor die hele land het verlede week in Oudtshoorn byeengekom om aan die Suid-Afrikaanse padfietskampioenskap deel te neem. Verskeie van Mosselbaai se ryers het aan die kampioenskap deelgeneem en uitstekend gevaar. Hulle het gewys dat hulle geensins hoef terug te staan vir die res van die ryers in Suid-Afrika nie.
Tussen die groep Mosselbaaiers het hulle drie goue, een silwer- en een bronsmedalje verower.
Linèl Engelbrecht het vir die eerste keer aan die SA kampioenskap deelgeneem en uitstekend gevaar deur ‘n bronsmedalje in die tydtoets te verower.
Annemie Koen het Woensdag met die tydtoetswedren ‘n goue medalje verwerf en het Sondagmiddag met die kwik hoër as 30° Celcius, teen ‘n ervare groep ryers deelgeneem en ‘n uitstekende resultaat behaal. Annemie het 'n welverdiende silwermedalje verower in haar padwedren.
Fred van Zyl is die Suid-Afrikaanse kampioen in sy ouderdomskategorie in die tydtoets sowel as pad-afdeling nadat hy die goue medalje verower met beide wedrenne.
Sondagoggend het verskeie Mosselbaaiers deelgeneem.
Die wedrenne was almal baie kompeterend en hulle het goed gevaar in hulle afsonderlike ouderdomskategorieë. In hulle onderskeie ouderdomskategorieë het Carlu Pienaar 12de, Joffrey Pienaar 28ste en Pieter de Vos 15de gekom.
Henri Meyer het goed gery, maar het ongelukkig met 10km om te gaan geval en kon nie die wedren voltooi nie.