Bosse langs Louis Fourieweg verwyder
Te danke aan die Heiderand-buurtwag word bosse langs Louis Fourieweg vanaf die Mosselbaai brand- en rampbestuurdsdienste se basis tot by die Casinoweg-kruising verwyder. Volgens die voorsitter van die buurtwag, Peggy Roux, was dit 'n maande lange stryd om goedkeuring op provinsiale vlak te kry om wel die gebied te kon ontbos.
"Ons is baie dankbaar teenoor die wyksraadslid, Mark Furness asook die Demokratiese Alliansie (DA) op Mosselbaai, vir hulle ondersteuning met die deurvoer van die projek." Colin Puren, uitvoerende bestuurder strategiese dienste in die kantoor van die munisipale bestuurder, het die buurtwag bygestaan om toestemming te kry om wel die bosse te mag verwyder.
Volgens Roux het die buurtwag reeds vier jaar gelede met die proses begin. "Ons het baie klagtes van vroue, veral huishulpe gekry wat na werk langs Louis Fourieweg stap en langs die pad beroof en aangeval is. Misdadigers het die bosse gebruik om in te skuil." Die stasiebevelvoerder van die Mosselbaai-polisiestasie, lt kol Albert Haggard sê die inisiatief help beslis om misdaad te verminder. "Wanneer daar nie bosse is nie, kan misdadigers nie langs die pad daarin skuil nie. Ons ondersteun dus die projek."
Volgens Roux sal hulle nog minstens 'n week werk om die bosse te verwyder.