Dubbele tragedie tref gesin
Die Vaaltyn-gesin het die afgelope week tragies van twee jong kinders afskeid geneem.
In die eerste voorval is die graad 1-leerdertjie van Oker Primêr op Albertinia, Jody Vaaltyn, oorlede nadat sy by haar pleegouer, Monica Vaaltyn se huis geval en vermoedelik haar kop teen 'n klip gestamp het.
Monica vertel die kinders het oudergewoonte na skool hul skoolklere uitgespoel en opgehang. Een van die kinders het haar kom roep nadat Jody geval en op die grond bly lê het.
"Ek het onmiddellik met haar na my bure gehardloop, en vandaar is ons na die plaaslike kliniek waar die dokter en verpleegpersoneel probeer het om haar te red, maar tevergeefs."
Monica sê sy versorg Jody reeds drie jaar. Daar was 'n hegte band tussen haar en die kind wat geredelik vir haar drukkies gegee het.
"Ek wil graag die skoolhoof van Oker Primêr, mnr Tarentaal en personeel bedank vir hul bystand met die begrafnisreëlings en verwante sake. Hulle is vir my ware steunpilare."
Jody word Saterdag, 24 Februarie begrawe. Die huisdiens vind om 09:00 plaas, waarna die begrafnis om 10:00 uit die AGS Emmanuel-gemeente sal geskied. Intussen is verneem dat Jody se jonger boetie, Jeremiah Vaaltyn op Saterdag, 17 Februarie deur 'n voertuig getref is in Grassy Park, Kaapstad, waar hy saam met sy biologiese ma gewoon het. Hy het op Sondag, 18 Februarie aan sy beserings beswyk.