Basiese munisipale dienste nie vir almal
Die Handves van Menseregte soos vervat in die Grondwet van Suid-Afrika waarborg alle inwoners waardigheid en 'n veilige omgewing.
Die lewering van gratis basiese munisipale dienste aan veral armlastiges word in die Munisipale Stelselswet omskryf as 'n munisipale diens wat nodig is om 'n aanvaarbare en redelike lewenskwaliteit te verseker wat, sou dit nie voorsien word nie, aanleiding kan gee tot 'n openbare gesondheid, veiligheid of omgewingsgevaar. Plaaslike owerhede mag sover bekend nie hierdie basiese minimum munisipale dienste aan mense wat onwettig op privaateiendom woon, lewer nie.
Die voorsiening van gratis basiese munisipale dienste is die verantwoordelikheid van individuele munisipaliteite binne die breë riglyne van die departement van samewerkende regering en tradisionele sake (COGTA).
Die leidende COGTA-beginsels is; billikheid, doeltreffendheid, omgewingsvolhoubaarheid, finansiële lewensvatbaarheid, bevordering van ekonomiese ontwikkeling, implementeerbaarheid en om te verseker dat die regte mense voordeel trek. Meer spesifiek, is daar minimum standaarde vir die tipe basiese dienste wat voorsien moet word.
'n Gratis basiese watervoorsiening moet 25 liter per persoon per dag of 6 000 liter per huishouding per maand toelaat, en elke huishouding moet 50 gratis kilowattuur elektrisiteit per maand ontvang. Die sanitasievereiste is vir 'n veilige, skoon en higiëniese toilet naby die huishouding, met 'n bykomende 3 000 tot 4 000 liter water per maand indien die toilet aan 'n riool gekoppel is. 'n Plaaslik toepaslike vlak van afvalverwydering word ook bepaal.