Raadslid diep gegrief oor aantygings
Die provinsiale voorsitter van Icosa en Mosselbaai munisipale raadslid, Dawid Kamfer, het sy ontevredenheid uitgespreek oor aantygings dat hy sy ampsfunksie oortree het.
Raadslid Kamfer het 'n aanmaning, gedateer 12 Februarie van die speaker, raadsheer Petru Terblanche ontvang waarin hy gemaan word dat sy betrokkenheid by die gemeenskap van Powertown na bewering die gedragskode vir raadslede oortree. Raadsheer Terblanche sê in die skrywe dat raadslid Kamfer "op so 'n wyse opgetree het tydens die verskuiwing van inwoners vanaf Powertown na Sonskynvallei dat dit strydig blyk te wees met die optrede wat van 'n raadslid verwag word".
Daarbenewens lug die speaker sy kommer dat dit blyk dat raadslid Kamfer "ingemeng het met die administrasie van die munisipaliteit tydens Desember 2017 met die verskuiwing van inwoners vanaf Powertown na Sonskynvallei".
Uitbreiding 13
Raadslid Kamfer verwys na die onlangse openbare vergadering oor die voorgenome informele nedersetting wat vir Uitbreiding 13 beplan word, en vra hoe sy gemeenskapsbetrokkenheid verskil van dié van raadslid Rosina Ruiters, wat by daardie vergadering ook sterk standpunt ingeneem het teen 'n voorgenome munisipale projek. Hy meen die feit dat hy op versoek van die gemeenskap van Powertown opgetree het en regsverteenwoordiging bekom het vir diegene wat weier om na Sonskynvallei hervestig te word, strook met wat van hom as gemeenskapsleier en raadslid verwag word.
"Ek tree in belang van die mense op, nie in belang van die besluite wat op 'n gemeenskap afgedwing word nie. Hoe verskil my optrede van die griefskrifte wat raadslid Ruiters na aanleiding van die voorgenome plakkerskamp in Uitbreiding 13 ondersteun het? Gaan die DA-speaker haar ook vermaan?"
Persverklaring
Volgens 'n persverklaring van Icosa, meen die party raadslid Kamfer is "meegedeel om sy mond te hou of anders loop hy die gevaar om aangekla te word".
Icosa sê die speaker moet hom besig hou met die Demokratiese Alliansie (DA) se sake.
Raadslid Kamfer het bevestig hy is tans in gesprek met regsverteenwoordigers om regsadvies oor die aangeleentheid in te win.
"Ek sal my nie laat intimideer of stilmaak nie," sê raadslid Kamfer.