Geestelike leiers môre weer in gesprek
Na die suksesvolle byeenkoms op 27 Januarie, sien geestelike leiers uit na die tweede gesprek oor kerkeenheid in Mosselbaai.
Dié geleentheid vind môre, Saterdag 24 Februarie vanaf 10:00 tot 12:00 by die Pentecostal Holiness Church (House of Mercy) op die hoek van Alhofrylaan en Randstraat in D’Almeida, Mosselbaai plaas.
“Die eerste gesprek is bygewoon deur ongeveer 60 leiers en ons sien uit na nog ‘n geseënde opkoms”, aldus pastoor Kobus Klaaste. Die tema vir die gesprek is Persoonlike verhoudings binne die liggaam van Christus.
Alle leiers, ook diegene wat nie die eerste gesprek bygewoon het nie, word uitgenooi om deel van die opvolggesprek te wees.
Die inisiatief vir hierdie broederlike gesprekke word geneem deur pastoor Klaaste wat ‘n passie het vir die eenheid van die liggaam van Christus.
In Mosselbaai bestaan daar reeds verskeie ekumeniese forums wat van tyd tot tyd vergader en soms spesiale geleenthede saam aanpak. Hierdie is egter nie ‘n poging om net nóg ‘n forum te stig nie, maar om organies ‘n eenheid onder gelowiges te help skep.
Lede van al die bestaande forums word daarom uitgenooi om by hierdie broederlike gesprek in te skakel.
“Ons soek nie ons eie eer, belang of wil nie, maar doen dit uit gehoorsaamheid aan God se Woord wat gelowiges herhaaldelik oproep tot eenheid en liefde onder mekaar,” sê pastoor Klaaste.
Persone wat meer oor die gesprekke wil weet kan skakel met past Pierre (083 773 4910), Kobus (082 968 3674) of Isak (082 562 8928).