Bedrieg met slenter
Kobus Nieman, skryf:
Ek verwys na die brief van Dawid Vermeulen in die Mossel Bay Advertiser van 9 Februarie. Presies dieselfde het met my gebeur toe ek my dogter se motor op 16 Januarie 2018 vir diens na ‘n bekende handelaar wat met ‘n “K” begin op George geneem het.
Gewoonlik verwag jy ‘n oproep van ‘n handelaar wat jou meedeel dat die ruitveërs vervang moet word teen astronomiese pryse, hoewel die motor nog dieselfde ruitveërs het wat die handelaar al in
2014 aanbeveel het moet vervang word.
Dit is waar hulle winste is. Ek was totaal onkant gevang, aangesien ek die motor se passasiersruit in November 2017 moes laat vervang nadat daar by haar motor ingebreek is in Bloemfontein en ek die tegnikus toe gevra het om na die windskerm te kyk vir enige splintermerke en hy geen kon vind nie.
Nou was daar drie nuwe splintermerke wat herstel moes word.
Toe ek die motor later die dag afhaal by die handelaar, was daar drie blou plakkers wat kwansuis die splintermerke aandui het wat herstel is.
Groot was my dogter se verbasing toe sy dit sien en het dit dadelik uitgewys dat die een herstelplek reeds ‘n paar jaar van te vore herstel is.
Ek glo in die gesegde “Leef en laat leef”, maar wanneer ‘n besigheid op so ‘n slinkse wyse bedryf word, moet dit gestop word.
Dit sal goed wees om uit te vind hoeveel kliënte so bedrieg is.