Veilig in die kuberwêreld
Jou bankkaart is ‘n uiters belangrike besitting. Die hoofrede hiervoor is natuurlik die sensitiewe inligting wat daarop gedruk is, asook die inligting wat elektronies op die mikroskyfie en/of die magnetiesestrook gestoor is.
Verlede week het ons gesien dat goedere en dienste aanlyn (deur die internet) gekoop kan word met slegs die inligting op die voor- en agterkant van jou bankkaart. Sulke aankope kan van enige plek, regoor die wêreld gedoen word. Dus is dit so belangrik dat jy hierdie inligting absoluut konfidensieël hou.
Hierdie week gesels ons oor die veilige manier van aankope waar jy jou bankkaart gebruik om te betaal vir die goedere of dienste aangeskaf. Wanneer jy jou bankkaart gebruik om te betaal word twee dinge normaalweg benodig.
Eerstens, jy moet jou bankkaart by jou hê en tweedens, of jou handtekening of ‘n privaat viersyfer nommer (‘n PIN – persoonlike identifikasie nommer ). Banke probeer wegdoen met handtekeninge aangesien dit maklik nagemaak kan word of, in meeste gevalle, kyk die persoon by die betaalpunt nie eers of die twee handtekeninge dieselfde is nie. ‘n Meer veilige manier, om ‘n transaksie te bekragtig, is die gebruik van ‘n PIN – iets wat slegs jy behoort te weet.
Dit is uiters belangrik dat hierdie PIN absoluut konfidensieël gehou word. ‘n Skelm kan nie veel doen slegs met jou PIN nie, maar indien die skelm jou PIN weet en jou beursie met bankkaart daarin kan bekom, kan die skelm baie vinnig jou geld in die hande kry.
‘n Ander bekende slenter is wanneer iemand jou kaart kloon. Dit beteken dat die skelm die elektroniese inligting op jou kaart skandeer en dan ‘n presiese kopie van jou kaart (laat) maak. In so ‘n geval het die skelm dan ‘n kopie van jou kaart en, indien die skelm jou PIN ook ken, gaan daardie skelm jou rekening leeg koop of al die geld trek by ‘n OTM.
Wenk vir hierdie week
Beskerm jou
PIN. Sorg dat niemand sien as jy jou PIN insleutel nie, hou die sleutelbordjie toe met jou ander hand.
Volgende week kyk ons verder hoe mens jou bankkaart veilig in die kuberruimte kan gebruik.
E-pos gerus vrae aangaande die inhoud van hierdie artikel na rossouw@mandela. ac.za
Prof Rossouw von Solms is ‘n emeritus professor en lid van die Sentrum vir Navorsing in Inligting en Kubersekerheid aan die Nelson Mandela Universiteit.