‘Juwele weggegee’
Ontwikkelingsvoorstelle vir die onontwikkelde Souwesiastrand het tydens die afgelope maandelikse raadsvergadering tot heelwat emosie in die raadsaal aanleiding gegee.
Die ontwikkelingsvoorstelle wat voor die raad gedien het, maak voorsiening vir 'n 30 jaar tender aan 'n privaatkontrakteur wat Souwesia volgens riglyne moet ontwikkel en bestuur. Sowat 48% van die area moet in 'n driestergegradeerde, dog bekostigbare woonwapark ontwikkel word, met die res van die ontwikkeling wat vir 'n dagbesoekersarea, 'n feesterrein, asook parkering en vrye toegang tot die strandgebied voorsiening moet maak.
Die aanbeveling is uiteindelik met 'n meerderheid van stemme deur die raad aanvaar. Vervolgens sal 'n openbare deelnameproses volg waarna die item weer voor die raad sal dien.
Volgens die aanbevelings sal die deel van Souwesiastrand waarop die De Vette Mossel-restaurant tot stand gekom het, van die voorgenome ontwikelingsvoorstelle uitgesluit word.
Die suksesvolle tenderaar sal uiteindelik
Die munisipaliteit sal van alle grondeise kwytgeskeld wees en die ontwikkelaar sal die volle risiko in hierdie verband moet neem.
verantwoordelik wees vir al die infrastruktuur-ontwikkeling en sal die oord vir die volle 12 maande van die jaar bedryf moet word. Die munisipaliteit sal van alle grondeise kwytgeskeld wees en die ontwikkelaar sal die volle risiko in hierdie verband moet neem.
Opposisie
Uitgesluit die ACDP wat verskoning vir die vergadering aangeteken het, het al die opposisiepartye hulle sterk uitgespreek teen die voorgestelde ontwikkelingsvoorstelle. Trouens, raadslid Stanford Mbandezi van die ANC het selfs teen grondgrype gewaarsku.
Die ANC hoofsweep, raadslid Jovan Bruinders het daarop gewys dat die Khoi die inheemse mense van dié streek is en het 'n beroep op die raad gedoen om die grond en geleentheid vir regstelling te gebruik. "Ons, die ANC sal ons deur die insette en wil van die mense van Groot-Brakrivier laat lei."
Die Vryheidsfront Plus-verteenwoordiger, raadslid Chief Elroy Baron, het gesê hy het oorleg gepleeg met die nasionale leier van die Khoi-gemeenskap en het die versekering gekry dat alle Khoi-gronde met die erkenning van die Khoi as 'n Suid-
Afrikaanse nasie aan die Khoi-gemeenskap teruggegee sal word. "Dit sluit hierdie gronde, ook die hele Wes-Kaap in."
Juwele verkwansel
ANC-raadslid Stanford Mbandezi het opgemerk dat 'n bekommeringswaardige tendens in die raad besig is om te ontwikkel. "Wat ek oplet, is 'n tendens van hierdie raad om al die juwele van Mosselbaai in die hande van die rykes te plaas sodat net die rykes daarby kan baat."
Icosa-raadslid Dawid Kamfer het die raad ingelig dat hy volgens 'n petisie, onderteken deur 200 mense, daarop aandring dat die strand na die oorspronklike eienaars moet terugkom.
"Souwesia is 'n baie sensitiewe saak. Dis 'n netelige kwessie wat nie net die mense van Groot-Brakrivier nie, maar alle Mosselbaaiers raak. Icosa sal baklei namens die mense tot aan die einde. Hoekom die strand verhuur vir 'n termyn van 30 jaar?" Icosa se teenvoorstel is deur raadslid Baron gesekondeer.
Gemeenskapsinsette
Raadslid Cliffie Bayman, voorsitter van behuising in die burgemeesterskomitee het daarop gewys dat die insette van die gemeenskap in talle openbare vergaderings bekom is alvorens die item voor die raad gedien het.
Die enigste deel van die strandgebied wat ontwikkel kan word is die ou woonwapark wat weens vandalisme in onbruik verval en verder gevandaliseer is. Weens die gevaar vir strandgangers is die bouvallige strukture deur die munisipaliteit verwyder. Tydens gemeenskapsvergaderings het die gemeenskap hul sterk uitgespreek teen 'n privaatontwikkelaar uit vrees dat die grond in 'n tweede Diasstrandontwikkeling sal ontaard. Die munisipaliteit is nie voornemens om die strandgebied op munisipale koste te ontgin nie. Benewens die bestuur van die De Bakke/ Santos-woonwapark wat reeds geprivatiseer is, is die munisipaliteit ook voornemens om die bestuur en opgradering van die Puntwoonwapark te privatiseer.
Benewens die ontwikkeling van die huidige ou kampterrein, word voorgestel dat die res van die erf as natuurlike oopruimte met natuurlike habitat behoue sal bly.
Vervolgens sal die voorgeskrewe openbare deelnameproses volg, waarna die insette van hierdie proses weer voor die raad vir 'n finale besluit sal dien.