Wetstoepasser in ongeluk
'n Wetstoepasser verbonde aan die Mosselbaai-munisipaliteit het, nadat hy skynbaar 'n ongeluk op Mayixhaleweg in KwaNonqaba veroorsaak het, die toneel verlaat en vir die polisie weggekruip.
Volgens bevestigde inligting van die KwaNonqaba-polisie het dit vir polisielede wat die ongeluk gesien gebeur het voorgekom asof die wetstoepasser opsigtelik onder die invloed van alkohol was oomblikke na sy voertuig met 'n rooi bakkie gebots het.
Die wetstoepasser, wie se naam bekend is maar nie geïdentifiseer mag word alvorens hy in die hof verskyn het nie, het volgens ooggetuies direk na die ongeluk op Dinsdag, 3 April sy vuurwapen uit die skede verwyder en, met die vuurwapen in sy hand, teen 'n muur vasgehardloop toe hy van die toneel probeer weghardloop het.
Hy het direk daarna oor 'n heining gespring en, toe die polisielede ondersoek instel, blyk dit hy het ook uit hierdie erf ontsnap deur oor 'n verdere heining te spring en weg te hardloop.
Die KwaNonqabapolisie ondersoek klagtes van onder meer roekelose en nalatige bestuur, dronkbestuur, die hantering van 'n vuurwapen terwyl onder die invloed van alkohol, asook regsverydeling.
Na wat verneem word, was die wetstoepasser veronderstel om dieselfde aand van die ongeluk vir diens aan te meld.
Die polisie ondersoek klagtes van roekelose en nalatige bestuur, dronkbestuur, die hantering van ‘n vuurwapen terwyl onder die invloed van alkohol, asook regsverydeling.