Verbod op verwydering van tuinvullis onbillik
André Delport, skryf:
Ek verwys na die vorige kennisgewing in die Mossel Bay Advertiser waarkragtens die Mosselbaai-munisipaliteit kennis gegee het dat ons as inwoners nie meer ons tuinvullis in swart sakke mag plaas nie. Ek is die afgelope 15 jaar 'n inwoner van Danabaai en, soos die meeste ander inwoners onderhou ek die sypaadjie tussen my erfgrens en die padoppervlak op my onkoste.
My argument is dat, indien ons as inwoners die sypaadjiegedeeltes - wat aan die munisipaliteit behoort - op ons koste in stand moet hou, hoekom mag ons nie daardie gras wat ons weekliks sny in die swart sakke plaas om deur die munisipaliteit verwyder te word nie?
Ons spaar die munisipaliteit derduisende rand jaarliks deur die sypaadjies self instand te hou. Indien die munisipaliteit dus versoek dat ons self hierdie tuinvullis moet wegry, is die vraag hoekom die munisipaliteit die inwoners nie betaal vir die instandhouding van hul eiendom nie?
Ek dink dit is onbillik van die munisipaliteit om ons te verbied om die gras wat ons op munisipale eiendom sny in swart sakke te plaas. Ek aanvaar daar mag ander persone wees wat takke en ander tuinvullis in die swartsakke plaas, maar vir die normale inwoner wat slegs die sypaadjie se gras in die swartsakke plaas, voel ek dis onredelik dat so 'n verbod geplaas word.