Gesoute akteur vertel meesterlik
Deurwinterde akteur Eric Knobbs het weer eens bewys waarom hy reeds 40 jaar sinoniem is met die vermaaklikheidswêreld en steeds sy plek op die verhoog kan vol staan. Knobbs het Vrydagaand, 30 Maart geskitter in sy eenmanvertoning by die Monroe Teater as ou Stoffel Gieljam, Sagmoedige Neelsie se "neef". In hierdie klassieke stuk Doppers en Filistyne van CJ Langenhoven, spreek ou Stoffel hom omtrent uit oor die dorpslewe in tipiese tradisionele Afrikaanse humor gegrondves in vanmelewe se voorhuistaal.
Tipies aan Langenhoven, is die humor opgesluit in fyn woordspeling en gekruisde lyne wanneer mense, veral verskillende geslagte, met mekaar kommunikeer.
Die knus klein teatertjie was stampvol gepak en die gehoor het alte lekker rondom hulle piekniekmandjies gekuier voor die vertoning. Knobbs het die bykans uurlange eenmanvertoning moeiteloos aangebied en die teks met gemak en absolute geloofwaardigheid oorgedra soos net 'n verhoogveteraan kan doen. Die argaïese woorde wat in die stuk opduik het die gehoor dikwels laat skater, veral die kinders wat dit nietemin baie vermaaklik gevind het.
Kommentaar vanuit die gehoor na afloop van die vertoning was dat die kwaliteit van Knobbs se vertelstyl onvergelykbaar is. "As jy goed is, is jy goed," was die algemene