Hartenbos NG Kerk hou basaar

Die NG Kerk Hartenbos hou die naweek van 6 en 7 April basaar op hulle kerkterrein.

Die gewilde witolifante-tent sal op Vrydag, 6 April vanaf 13:00 tot 20:00 oop wees vir verkope. Volgens vorige basaargangers is dit verseker die grootste winskopie-geleentheid in die Suid-Kaap. "Kom vroetel rond en koop jou winskopies hier."

Vrydagmiddag vanaf 16:00 is daar 'n speletjiesaand vir oud en jonk. "Kom daag die predikante uit met driebeenresies en talle ander speletjies." Heerlike roosterkoek met vulsels, asook eetgoed vir kinders sal dan ook te koop wees. "Bring die hele gesin saam en kom deel in die pret."

Saterdag

Op Saterdag, 7 April is die basaar in die kerksaal. Basaargunstelinge is beskikbaar soos pannekoek, poeding, koeke, beskuit, kleinkoekies, kerrie en rys, asook worsbroodjies. Daar sal ook vars groente en soos voorheen, baie goeie kwaliteit vleis van De Rust te koop wees. Vleisbestellings kan vooraf by die kerk geplaas word. Skakel 044 695 1942 vir meer inligting, soggens behalwe op Maandae.

Daar sal ook 'n spesiale afdeling vir handgemaakte artikels van die gemeente wees. Dit sal alles te koop aangebied word. "Kom kyk gerus watter talent het na vore gekom. Hierdie is 'n naweek om op jou kalender aan te teken. Jy sal dit nie wil misloop nie." Vir enige navrae kontak Heleen Coetsee (082 454 5724).