Gesonde gees kenmerk AJ Sportweek vanjaar

Sedert verlede Woensdag het sowat 1 200 geesdriftige jong sportmanne en -vroue saam met hulle afrigters, onderwysers en ouers, in Mosselbaai aangekom om deel te neem aan die sewende jaarlikse Arthur Johnson Sportweek.

Hierdie gewilde gebeurtenis lok jaarliks rugby-, hokkie- en netbalspanne van regoor die hele land en sover as Namibië. Vanjaar het 31 skole kom deelneem. Afrigting deur kundiges het Donderdag en Vrydag plaasgevind waarna wedstryde in alle erns Saterdag begin het met die finale wedstryde op Maandag. Benewens al die sportaktiwiteite, word daar ook elke jaar 'n Mnr en Mej Sportweek gekies. Cé-het Nel van Hoopstad is aangewys as Mej Sportweek terwyl Hoërskool Punt se Calvin Bezuidenhout met die manlike titel weggestap het. Oor die algemeen word ‘n pragtige gees van respek onder die jong sportmanne en -vroue ervaar en word daar selfs buite die Van Riebeeck-stadion ‘n positiewe en meelewende beeld uitgeleef.

Dit het onder ons aandag gekom dat die netbalspan van Hoërskool Ben Viljoen (Groblersdal) al die afgelope drie jaar ‘n ongelooflike mooi gees openbaar buite die sportveld. Hulle besoek elke jaar mevrou Sylvia Palmer, (98) om haar te bedank dat sy altyd vir hul glimlag en waai vanuit haar venster. Hulle bring dan vir haar blomme en klein geskenkies. Mevrou Palmer is onlangs na Onse Rus-tehuis en die span het haar daar gaan besoek en haar hart en kamer gevul met vreugde.

Netbalafrigter Juline van der Merwe het aan die Mossel Bay Advertiser genoem dat daar baie afrigtingsklinieke oral in die land aangebied word maar dat die AJ Sportweek in Mosselbaai, in ‘n klas van sy eie is. Die welwillendheid, vriendelikheid en professionele organisasie is uniek en vandaar die gewildheid van hierdie jaarlikse gebeurtenis.

In die woorde van hooforganiseerder Estelle Johnson: “Sport het weer eens hoogste prioriteit gekry en dit was ten spyte van harde werk en maande se organisasie, heerlik om die geleentheid te kon aanbied. Daar is reeds skole wat aangedui het dat hulle in 2019 weer kom deelneem."

Foto’s: Tersia Marais Die seunswenspan van HS Oudtshoorn glimlag trots met hul medaljes om die nek.

Die onder 16 A-hokkiespan van Hoërskool Punt het besonder goed gevaar in al hulle

Rugbyafrigter Norman Laker verduidelik ‘n tegniek aan die groep rugbyspelers.

Die netbalafrigters vir die week was Shannen Bartlett, Mandy Hermanus, Rene de Jager en Juline van der Merwe.

Eleonor Tswaile van Ferdinand Postma in Potchefstroom (tweede prinses), Cé-het Nel van Hoopstad, Mej Sportweek en Kylie Kotze van Elnatan in Stampriet Namibië (eerste prinses).

Uzain Saban van Grootte Schuur in Kaapstad (twedde prins), Hoërskool Punt se Calvin Bezuidenhout wenner Mnr Sportskool 2018 en Taegan van Niekerk ook van HS Punt (eerste prins).

Mede-Springbokafrigter Matthew Proudfoot het ook aan die manne ‘n hele paar nuttige wenke gegee.

Liam Carolissen, eerstespan-rugbyspeler en matrikulant van Hoërskool Punt word van die veld afgedra nadat hy ‘n ernstige mondbesering opgedoen het.