Onbedoelde gevolge ná skoonmaak
Inwoners van Aslapark wat op die soom van die dorp naaste aan die N2 woon, kla dat hul kinders gereeld siekerig is, meer nog, hulle kla oor die hope vullis wat vlieë lok, oor die onaangename, selfs vrot reuke wat hulle moet trotseer wanneer hulle kos maak.
Aslapark se mense wat in formele huise op die dorpsgebied se grens woon, word blootgestel aan vullis wat ophoop op die privaat - grond wat grens aan die area waar hulle woon en waar informele strukture teen 'n kommerwekkende tempo toeneem. 'n Hoëvlak-afvaardiging van die Mosselbaaimunisipaliteit het op Donderdag, 31 Mei die areas waar rommel 'n wesenlike probleem is, besoek. Die uitvoerende burgemeester, raadsheer Harry Levendal, die munisipale bestuurder, adv Thys Giliomee, uitvoerende raadslede en direkteure het met inwoners in gesprek getree en verskeie vergaderings het op dié besoek gevolg. Belangriker nog, kontrakteurs het vanaf Maandag, 4 Junie met opruimingswerk begin op die strook waaroor die Mossel Bay Advertiser op Vrydag, 23 Februarie (Rommel verswelg woongebied) berig het. Die munisipaliteit het sedertdien verduidelik dat voorgeskrewe, dog tydsame prosesse om kontrakteurs aangestel te kry, gevolg moes word alvorens met die opruimingswerk begin kon word. Hoewel van die opruimingsaksies op privaatgrond is, moet dit gedoen word juis om die veiligheidsrisiko en gesondheidkwessies vir inwoners teë te werk.
Grondgrype
Sedert die Advertiser teen einde Februarie oor die vullisprobleem berig het, is egter sowat 200 informele strukture in die area gevestig. Pleidooie dat die hope vullis verwyder moet word, het waarskynlik onbedoelde gevolge meegebring. So vinnig as wat die stootskraper vullis op 'n hoop stoot, só vinnig is opportuniste besig om "erwe" op die privaatgrond uit te merk.
Met die Advertiser se besoek op 6 Junie is 'n man opgemerk waar hy paaltjies inkap, toue span en met rooi vlaggies uitmerk om grond af te baken. In gebroke Engels het hy beweer hy doen die werk in opdrag van "'n vrou" wat hom aangestel het daarvoor.
Hofprosesse
Inwoners wat naby die area woon, het die bewering gestaaf en ook verwys na "die vrou" wat "erwe" aan voornemende inwoners toewys.
Inwoners sê munisipale wetstoepassers het wel van die strukture laat verwyder, maar dit word - soos die onwettige kragaansluitings feitlik onmiddellik weer herstel wanneer die personeel hul rug draai. Sodra 'n struktuur bewoon word, moet die howe genader word vir uitsettings ingevolge die wet op die Voorkoming van Onwettige Uitsetting en Onregmatige Besetting van Grond (PIE), 'n besondere tydsame proses wat gewoonlik vereis dat munisipaliteite / grondeienaar alternatiewe, permanente verblyf bied alvorens die hof 'n uitsettingsbevel toestaan. Op privaatgrond moet die privaat-eienaar die wetlike proses volg.
Betaal huur
Sommige inwoners van die informele strukture het reeds in Februarie beweer hulle huur die strukture van diegene wat begunstigdes van formele behuising is maar informele strukture op die onbenutte grond oprig om 'n huurinkomste daaruit te maak. Beweringe oor die huur het herhaaldelik voorgekom, hoewel niemand bereid was om die naam bekend te maak van die persoon aan wie die huur oorbetaal word nie.
Steel krag
Van die inwoners, wat op voorwaarde van anonimiteit met die Advertiser gepraat het, beweer dat die inwoners van die informele area - wat skerp toeneem - hulle selfs met pangas dreig om toegang tot kragpale in hul erwe te bekom. In die informele area is netjiese "kragpale" aangebring om die onwettige verlengkoorde luglangs tot by die huise te neem. By sommige strukture brand buiteligte selfs bedags. Talle informele strukture vertoon satellietskottels. Weens die onwettige kragaansluitings beleef groot dele van onder meer Aslapark gereeld kragonderbrekings. Die afgelope week het wateronderbrekings na bewering ook voorgekom. By een van die nuwe informele strukture wat na bewering aan 'n bekende taxi-eienaar behoort, is twee entrepreneurs aangetref wat 'n netjiese teëlvloer aanbring. By 'n ander huis is netjiese afskortings aangebring om te verhoed dat voertuie in die struktuur vasry. Inwoners uit die omliggende area beweer dat dit veral buitelanders is, mense van Mosambiek, Zimbabwe, Nigerië en Somalië wat hulle in die informele strukture vestig. Daar is selfs sprake van aparte buurte. Van die mense wat in die informele strukture woon, beweer hulle het van Endlovini na dié area verskuif ter wille van 'n beter lewe.
"Hier is die mense nie so onbeskof soos daar bo nie, dis miskien nie skoon nie, maar dis veiliger hier," beweer een van die inwoners. Intussen speel kinders ongestoord tussen die vullis en op areas waar rommel opgeruim is. Vroue kla omdat hulle vroegdag met die aand se kos moet begin, want die kragtoevoer is onbetroubaar. 'n Taxi kom verby en laai 'n hoop planke af. Nog 'n huis sal waarskynlik oornag verrys.