Vroue gee met liefde
Jantjie
Al lê die berge nog so
blou.
Gesondheid portefeulje sameroeper Leatitia Steyn en haar span het weer op Dinsdag, 29 Mei gesorg vir 'n propvol program vir die lede van die Klein Brak VLV-tak.
Flink en gewillige lede het soos gewoonlik hulle tyd en aandag met liefde gegee aan hulle gemeenskapen omgeeprojekte. Daar is gesellig geknip, gestik en gestop aan mastektomiesakkies en -kussinkies vir Kansa. 'n Reuse hoeveelheid artikels is reeds vir hierdie projek gemaak en versamel en gaan in Julie aan Kansa oorhandig word.
Pêrel Kruger het meer vertel van die plastiekproppe- en broodknippieherwinningsprojekte om rolstoele aan gestremde persone te skenk. Tot dusver is daar al 14 rolstoele aan behoeftige gestremdes van onder meer Kansa, Watsons ouetehuis en so ver as Tsitsikama, Joubertina en Van Wyksdorp geskenk.
Verskeie skole en biblioteke in die omgewing is ook reeds by hierdie projek betrokke. Items kan by Interwaste ingeweeg word waarna dit deur Forever Planks, Extra Wood en Extra Caps verwerk word. Hou in gedagte dat 'n vol swartsak met proppies/ knippies sowat 12kg weeg en dat ongeveer 50kg broodknippies nodig is vir een rolstoel, so almal sal moet inspring.
Hierdie projek word deur die tak ondersteun omdat elke klein poging 'n bydrae lewer om die wêreld rondom ons op te ruim. Besoedeling is, soos ons almal Royals weet, 'n groot probleem. Ons lees en hoor al hoe meer van die plastiekprobleem. Pêrel het met haar navorsing weer almal tot nadenke gedwing oor die +- 300 miljoen ton plastiek wat jaarliks vervaardig word. Voeg hier by dat min of meer die helfte van hierdie vervaardigde items vir eenmalige gebruik is. Meer skrikwekkend is dat bykans 91% hiervan nie herwin word nie dan die onstellende feit dat 8 miljoen + ton plastiek wêreldwyd in die see eindig en ons seevoëls en -diere daarvan uitsterf. Niemand mag ongeërg oor hierdie probleem staan nie.
Ken-mekaar-uitstappie
Op 26 Junie doen die tak 'n ken-mekaaruitstappie en die volgende vergadering is op 31 Julie. Gedurende die Julie byeenkoms gaan Lynde Minne van Hartenbos Interwaste meer inligting gee oor hulle projek om sonder enige wins, plastiek afval te verwerk en herwin. Diegene wat belangstel en graag die geleentheid wil bywoon, kontak gerus die Klein Brak VLV-tak, sameroeper vir openbare sake, Elrina van Zyl (072 363 9793).