Oakdale se oudskoliere vier fees

Tydens die 90-jarige feesvieringe van die Hoër Landbouskool Oakdale, is oudskoliere wat sover terug as 1950 in matriek was, op Oakdale verwelkom.

Volgens die skoolhoof, André Latsky, was dit baie lekker om weer “al die kinders by die huis te hê”. Op ‘n vraag wat hom gedurende die naweek gevra is, was sy antwoord aangaande wat die geleentheid besonders maak: “Die trots, respek en blydskap waarmee ons oudleerders terugkom skool toe”.

Die betrokkenheid van oudskoliere het sedert Donderdagaand tot die sukses van die fees bygedra.

Tydens die Oakdale-skouspel het nege oudleerders ‘n sangaand van hoogstaande gehalte aangebied. Die Oakdale-sangtalent oor verskillende jaargroepe heen het die gehoor van 120 mense op indrukwekkende wyse bekoor.

Dit was Saterdagaand tydens die oudskolieredinee opvallend met watter dissipline en respek hulle opgetree het toe sprekers aan die woord was.

Staaltjies uit vervloë dae het opnuut bygedra tot die ryke tradisie van die skool en het Oakdale opnuut ‘n stukkie “nuwe” geskiedenis ontdek.

Meneer Danie Grundlingh (1956) was een van die leerders wat by die aanplanting van die pekanneutbome net agter die skool betrokke was. ‘n Nuwe tendens by die jonger geslag is om met hulle oudskolier-oortrektrui en -das skoolgeleenthede by te woon.

Na afloop van ‘n naweek soos hierdie, is die Oakdale-bande van trots, dissipline en samehorigheid opnuut versterk. Die hoogtepunt van die fees was verseker die dankseggingsdiens wat Sondag deur Riekert Botha aangebied is.

Oakdale bedank die kerke en gemeenskap van Riversdal vir ondersteuning, liefde en betrokkenheid oor die afgelope

90 jaar.

Oakdale-oudskoliere het die besoekers bekoor met sangtalent. Oom Danie Grundlingh was een van die leerders wat in 1952 die pekanneutbome op Oakdale geplant het. Hier is Danie van Deventer (1956), Danie Grundlingh (1956) en Gawie Volschenk (1950).