Rugbylegendes met uitstalling vereer
Die plan om aan die oudrugbyspelers van Mosselbaai wat onder die vaandel van die nie-rassige SA Rugby (Saru) gespeel het, erkenning te gee vir hulle bydrae tot die sport, sal eersdaags momentum kry met ’n uitstalling in 'n plaaslike museum.
Dit is egter net die begin van ’n proses van genesing om die eer van die spelers te herstel, vertel Joey Daniels, voorsitter van die Mosselbaaise Rugbylegendes, 'n groep oudrugbyspelers.
“Dit was ‘n lang pad tot dusver en daar lê sommer harde werk voor,” sê Daniels, ’n voormalige voorsitter van die Suidwestelike Distrikte Rugbyunie en lid van die Stormersbestuursraad.
Daniels sê onderhandelinge met die munisipaliteit is ver gevorder en die Mosselbaaise Rugbylegendes is reeds uitstalruimte binne die museum gewaarborg.
“Maar dit is net die begin van proses waar ons ‘n sportmuseum wil oprig. Ons wil alle rugby- en sportgeskiedenis van regoor die spektrum hier uitstal. Ons gemeenskappe het ’n trotse sport- en rugbygeskiedenis.
“Apartheid het ons verneder en die wonde is duidelik sigbaar as jy sien hoe die manne wat opofferinge gemaak het om rugby te bevorder, nou sukkel,” het Daniels gesê.
Hy het ook ’n beroep gedoen op oudspelers en inwoners van die dorp om ou foto’s en items van sentimentele waarde aan te stuur sodat dit oorweeg kan word vir die uitstalling in die museum.
Daniels sê die rugbylegendes het besluit om later vanjaar meer betrokke te raak in skolesport om rugby in die streek te bevorder.
Byeenkoms
Rugbylegendes van Mosselbaai wat onder die vaandel van Saru gespeel het, het onlangs in die D’Almeida-gemeenskapsaal bymekaargekom. Die hartseer en blydskap was duidelik te bespeur.
Die oudpselers het van oral af gekom om standpunt te neem oor erkenning in die geskiedenis van Suid-Afrikaanse rugby, asook in hul geboortedorp.
Terwyl die seremoniemeester, Derrick Petersen, een naam ná die ander uitgelees het, is daar vanuit die gehoor gevra: “Waar sit hy?” en “Ek sal like om hom te sien.”
Petersen het oom Nellis du Plessis, David Cassy en die ander van die verhoog af uitgewys. “Daar sit Basil 'Boere' Mitchell,” het iemand hardop gesê.
Cassy het sy uitnodiging vanuit Australië eerbiedig om die geleentheid by te woon. Van die gaste het in rolstoele die saal binnegekom en onder toejuiging hul teenwoordigheid bevestig.
Raadsheer Harry Levendal, die uitvoerende burgemeester van Mosselbaai was onder diegene wat hul staaltjies gedeel het. Levendal is een van die onbesonge afrigters en administrateurs wat die SWD-span gedurende die apartheidsjare gedien het.
"Dis tyd dat voormalige spelers die menswaardigheid wat hulle in dié opsig ontneem is, herwin en die Mosselbaaise gemeenskap en die munisipaliteit sal ’n rol móét speel in hierdie proses."