Tenniskompetisie op die 6de
Met die jaarlikse Mosselbaai Sportfees voor hande is daar vir tennisspelers van die omgewing ‘n geleentheid om gesonde kompetisie tydens die feestyd te kan geniet. Die Mosselbaai-tennisklub bied op Saterdag, 6 Oktober ‘n tenniskompetisie aan.
Die dag se tennis begin om 08:00 en sal in drie afdelings plaasvind: ‘n gemengde dubbelstoernooi, ‘n mansdubbels en ‘n junior of junior plus volwassespeler. Pare van ongeveer dieselfde sterkte sal teen mekaar speel in die formaat van ‘n rondomtalie: vier stelle met jou maat en vier stelle teen jou maat. Spelers moet verkieslik met ‘n maat inskryf. Indien ‘n voornemende speler sukkel om ‘n maat vind, vra die organiseerders om behulpsaam te wees.
‘n Prysuitdeling van medaljes en ander pryse sal direk na afloop van die kompetisie by die klub plaasvind. Die inskrywingsfooi van R120 sluit spel, balfooie en ‘n ligte middagete in.
Verversings deur die dag en braaipakke is te koop vir spelers wat na afloop van die prysuitdeling nog lekker om die vuur wil saam kuier.
Die sluitingsdatum vir inskrywing vir hierdie kompetisie is 3 Oktober om 12:00. Die hoeveelheid inskrywings kan dalk veroorsaak dat die formaat aangepas moet word.
Alle tennisspelers wat lief is vir tennis is welkom om in te skryf of meer inligting te bekom by Danie (082 779 0773), Johannes (076 188 1500) of Annerie (082 489 7997). Daar kan reeds geregistreer word op die webblad: https://mosselbaytennis.com of op facebook. Voltooi net die vorm en ‘submit’. Of bel en skryf in.
"Kom vier die lente saam met ons in die tradisie van die jaarlikse Mosselbaai Sportdag en kom geniet ook ons agterste bane wat nuut opgeknap is."