Geen nuwe inligting oor KwaNonqaba se polisiestasie nie
Die Wes-Kaapse LUR vir Gemeenskapsveiligheid, minister
Dan Plato en die adjunk-provinsiale kommissaris van die polisie in die provinsie, generaal majoor Mpumalelo Manci, het vroeër vandeesmaand as gaste van die uitvoerende burgemeester, raadsheer Harry Levendal besoek gebring aan Danabaai om inwoners se vrese oor hul veiligheid aan te spreek.
Minister Plato, wat intussen aangewys is om Patricia de Lille eersdaags as burgemeester van Kaaptad op te volg, het inwoners op 7 September belowe om hul besorgdheid oor onder meer die werksomstandighede - en die gebrek aan 'n openbare orde polisiëringseenheid - by die KwaNonqabapolisiestasie persoonlik te ondersoek en na die betrokke hoër owerhede te bevorder en aan die gemeenskap terugvoer te gee.
In die lig van Maandag se onrus wat Danabaaiers - hoewel kortstondig - weer eens in hul buurt vasgekeer het, het die Mossel Bay Advertiser die minister se woordvoerder vir die minister se beloofde terugvoer gevra:
“Die kwessie rakende KwaNonqabapolisiestasie is ‘n voortslepende een wat in die teenwoordigheid van die Provinsiale Kommisaris se kantoor uitgelig is asook iets wat ek al in die verlede deur die departement se oorsigmandaat oor polisiëring in die provinsie onder die Provinsiale Kommissaris se aandag gebring het. Die groter kwessie rondom hulpbronne – soos genoegsame personeel en infrastruktuur, onder andere polisiestasies – is egter nie iets wat onmiddellik opgelos kan word nie en by uitstek bly onder die beheer en besluitneming van die polisie se eie operasionele mandaat. Dit is dus besluite en oorwegings wat die onus van die Nasionale Polisie Minister en Nasionale Polisie Kommisaris is,” aldus minister Plato.
Die kwessie rakende KwaNonqabapolisiestasie is ‘n voortslepende een wat in die teenwoordigheid van die Provinsiale Kommisaris se kantoor uitgelig is.