Wegholtrok maak amok op pas
Marcois Louw en sy eggenoot het wonderbaarlik oorleef toe hul vragmotor Saterdag omstreeks 11:00 op die Robinsonpas onklaar geraak en digby die ingang na Ruiterbos omgeslaan het.
Volgens 'n omstander was dit net genade dat die insittendes die ongeluk oorleef het.
Die vragmotor en twee waens, wat staalstrukture van etlike tonnemaat vervoer het, het Saterdagoggend, 29 September teen die bloekombome by die ingang na Ruiterbos op die R328 te lande gekom. Louw, die eienaarbestuurder van die vragmotor het sover bekend 'n been in die voorval gebreek, en sy eggenoot het 'n enkel en skouerbesering opgedoen. Beide is na die Mosselbaai provinsiale hospitaal vir behandeling geneem. Marcois is sedertdien uit die hospitaal ontslaan terwyl sy vrou teen druktyd steeds in die George-hospitaal se intensiewe sorgeenheid behandel word.
Terblanche het egter met die grootste lof van 'n lid van die KwaNonqaba-polisie wat die toneel hanteer het, gepraat.
"Die polisielid het werklik die ekstra myl geloop. Hy het verseker dat die Louw-egpaar se persoonlike besittings beveilig word en het dit aan hulle terugbesorg. Hy het selfs tussenbeide getree toe 'n omstander 'n part van die vragmotor wederregtelik wou verwyder en ook dit aan die egpaar besorg. Hierdie lid was op die toneel en het met die grootste omsigtigheid en integriteit teenoor die publiek opgetree en verdien alle lof."
Die ongelukstoneel is eers sowat 20:00 op Saterdagaand opgeruim. Die Da Gamaskoppolisie ondersoek na wat berig word 'n saak van roekelose en nalatige bestuur.