Besorgde leser soek antwoorde
Arthur van Vuuren, skryf:
Dié skrywe verwys na die onlangse geweld en plundering op die N2 neffens Asla.
Die meeste feite is wel bekend en sosiale media het behoorlik gegons.
Die volgende besorgdhede word uitgelig:
• Dit word vermoed dat kriminele elemente doelgerig in sekere gemeenskappe ingevoer word, reeds om paniek, intimidasie en verwoesting te saai. Dis ‘n uiters gevaarlike situasie en bron van groot kommer, aangesien wetsgehoorsame inwoners toenemend ongelukkig raak. Met verwysing na gebeure elders, wil dit voorkom of geaffekteerde gemeenskappe nou begin saamspan om die misdadigheid en wanorde self aan te spreek.
• Dis skokkend om die barbaarse geweld, plundering en vernietiging van eiendom gade te slaan, met wetstoepassers wat bloot as toeskouers optree. Selfs kinders neem lustig deel aan die plundering, volgens videobewyse.
• Die Mosselbaaimunisipaliteit praat eerder met die oproeriges (kriminele elemente) as met erkende gemeenskapleiers van geaffekteerde gemeenskappe. Dis ‘n onuithoudbare situasie en daar word indringend versoek dat die MBM ook met ander gemeenskappe en organisasies vergader, om soedoende gesonde balans en blywende oplossings te bewerk en te handhaaf.
• Onwettige gronbesettings en oprigting van strukture gaan steeds ongehinderd voort, gevolg deur dienste-diefstal ten koste van wetsgehoorsame en wettige inwoners. Berigte word steeds ontvang, dat die MBM gestaak het om onwettige aansluitings te verwyder, wat bydra tot die invloei van selfs nog meer onwettige immigrante uit buurlande.
• Die wetstoepassers is bloot onwillig of ongemagtig om dié probleem aan te spreek.
• Onrealistiese eise word gemaak, deur sogenaamde “gemeenskapsleiers” wat duidelik ‘n anargistiese agenda najaag. Die eise is bloot onhaalbaar en boonop onbekostigbaar.
• Die wetsgehoorsame gemeenskappe (meestal ekonomies-bydraende groepe, wat sakelui insluit) word klaarblyklik gestraf deur onbekostigbare verhogings in dienstetariewe, asook vermindering in voordele, soos weer onlangs ervaar. Die afleidings kan gemaak word, dat dié bydraes hul weg vind om die gevolge van genoemde geweldadige, kriminele vernietiging van infrastruktuur en eiendom te herstel en/of vervang.
• Wanneer gaan die MBM die mandaat aan hulle toevertrou begin uitvoer en wet en orde herstel, soos toegelaat binne ons landswette? Ons wil asseblief dringend antwoorde hê, nie leë beloftes en verskonings nie.