Klasse vir tweedekans-matrieks: moet dit nie misloop nie
Vir die afgelope paar jaar is aan sommige graad 12-kandidate die opsie aangebied om hul matriekeksamen oor meer as een jaar te versprei. Hierdie program staan bekend as More Examnination Opportunities (MEO of Second Chance Matric).
MEO-kandidate wat vir sekere vakke in die Nasionale Senior Sertifikaat-eksamen (NSS) in Oktober/Novembrer 2018 geregistreer het, kan nou gebruik maak van addisionele tutorklasse by Knysna Sekondêre Skool en George Sekondêre Skool om hulle voor te berei vir die eksamen.
Vakke sal aangebied word in Afrikaans Huistaal, Besigheidstudies, Ekonomie, Geografie, Lewenswetenskap, Wiskundige Geletterdheid, Wiskunde en Fisiese Wetenskap.
Boonop sal Besigheidstudies, Lewenswetenskap en Wiskundige Geletterdheid ook in Mosselbaai by Hillcrest Sekondêre Skool en by Bridgton Sekondêre Skool in Oudtshoorn aangebied word.
Hierdie geleentheid is ook beskikbaar vir ander kandidate wat nie vanjaar by ‘n skool ingeskryf was nie, maar nog een of meer vakke kort om hul NSS te behaal.
Die volledige program met datums en tye vir die verskillende klasse is beskikbaar by die bogenoemde vier skole of by die onderwyskantoor in die vier dorpe hierbo genoem.
Alternatiewelik is die besonderhede ook verkrygbaar vanaf die volgende webtuiste https://wcedonline.westerncape. gov.za/documents/SeniorCertificate/ SeniorCertificate-index.html, waar daar ook skakels is na enkele elektroniese bronne.
Vyf klasse van drie ure elk, sal per vak aangebied word (15 ure in totaal). Op weeksdae sal die klasse duur vanaf 16:00 tot 19:00, en klasse geskeduleer vir Saterdae sal duur vanaf 09:00 tot 12:00.
Klasse sal tweetalig wees waar van toepassing. ‘
n Minimum van 10 kandidate wat vir ‘n vak by ‘n skool registreer, word vereis, en ‘n maksimum van 30 kandidate per vak kan by ‘n skool geakkommodeer word op eerste-reg eerste-weg basis.
Geen vervoer of etes/verversings sal verskaf word nie. ‘n Beperkte hoeveelheid leermateriaal sal per vak verskaf word.
Kandidate wat belangstel om hierdie geleentheid te benut, kan die skool waar die klasse aangebied gaan word of die onderwyskantoor in Knysna, George, Mosselbaai en Oudtshoorn nader om ‘n aansoekvorm te bekom. Die sluitingsdatum vir registrasie is 8 Oktober om 12:00.
Nadere besonderhede kan verkry word by mnr Bothma (023 415 2070 of e-pos bennie.bothma@westerncape.gov.za).
Alternatiewelik kan die skoolhoof by George High School (044 871 1194) geskakel word.
Kandidate word aangemoedig om hierdie geleentheid ten volle te benut.