‘n Arend bly ‘n arend
'n Arend bly 'n arend of hy sierlik deur die lug klief en of hy laag oor die aarde skeer. Net so in gholf. Dus, of Gloria Greyvenstein haar balletjie met twee sierlike lughoue tot in die gaatjie op nommer 10 gelanseer het en of twee heelwat laer (geluk)houe, een glo aange"woema" deur die pad, die balletjie daar laat beland het, is nie ter sake nie. (Dit was weliswaar onweerstaanbare tergmateriaal.)
Die onteenseglike feit bly, Gloria het trefseker aangelê. Boonop vang Jors nie oor 'n (gholf) arend vlieë nie. Min sosiale gholfers behaal dit en wie so presteer verdien 'n kloppie op die skouer. Buitendien het Gloria ook nog 'n spogtweetjie behaal en in haar afdeling gewen. Kortom, kruppel of te nie na 'n beseerde enkel en 'n lang afwesigheid, is haar gholf vuurwarm. Veels geluk Gloria. Hou dit tog vol vir volgende maand se moordende kragmeting teen George sodat daardie mooi trofee op eie bodem kan bly.
Uitslae
Die volledige uitslae in die verskillende afdelings van die vroue se houespel en setkompetisie was soos volg:
Silwer: 1. Gloria Greyvenstein (voorgee 12) netto-telling 73; 2. Christe Mari Meyer (voorgee 14) netto 76
Brons: 1. Cynthia Zietsman (voorgee 23) netto 73; 2. Jackie Braisher (voorgee 21) netto 75
Koper: 1. Rachel Mulder (voorgee 29) netto 77.;
Minste sette: Christe Mari (26); naaste aan die vlag op nommer 12 is Gloria wat ook 'n spogtweetjie op nommer12 behaal het.
Die wenner in elke afdeling het daardie gesogte glas-trofeetjie ontvang benewens 'n welkome geskenkbewys van Superspar Mosselbaai wat ook die naaswenners verbly het.