Rower val vrou aan met vurk, byt oor
Die 56-jarige bestuurder van 'n gastehuis in Hartenbos is erg getraumatiseer nadat sy Saterdagmiddag, 13 Oktober omstreeks 16:30 deur 'n onbekende man verskeie steekwonde toegedien en ook aan die oor gebyt is tydens 'n huisrooftog.
Volgens die Da Gamaskop-polisie se kommunikasiebeampte, kapt Wollie Fourie woon die vrou in 'n woonstel op die perseel. Sy was glo ten tye van die vooval by haar rekenaar besig toe sy die verdagte man gewaar wat toegang tot haar woonstel verkry het. Die vrou het die verdagte man glo by die deur probeer uitstamp en hom sodoende probeer uitsluit. 'n Struweling het ontstaan waartydens die verdagte haar herhaaldelik met 'n vurk gesteek het. Volgens inligting het die man die vurk saam met hom na die perseel gebring. Hy het ook haar regteroor bykans afgebyt.
Die verdagte het op die vlug geslaan met 'n kontantbedrag, die vrou se handsak, selfoon en beursie.
Die getraumatiseerde vrou het hierna haar suster gebel. Die polisie asook die buurtwag is geaktiveer.
Buurtwag geaktiveer
Volgens Tertius
Nothnagel van die Hartenbos-buurtwag is hulle noodplan dadelik geaktiveer. Hy is na die vrou se woonstel waar hy 'n beskrywing van die beskuldigde gekry en dit dadelik aan die buurtwag gesirkuleer het. "Ek was nogal geskok toe ek sien hoe sleg die vrou lyk. Sy was bedek met bloed."
Nothnagel sê dat ongeveer 20 buurtwaglede aktief na die verdagte gesoek het nadat hulle bepaalde bekende ontvlugtingsroetes beveilig het. Lede van die Bayview-buurtwag het 'n man wat aan die beskrywing voldoen ongeveer 'n uur later op die strand tussen Hartenbos en Bayview, onderweg na Mosselbaai, gearresteer. Die 32-jarige verdagte is aan lede van die Langeberg K9 hondeeenheid oorhandig.
Volgens Pieter de Villiers van die Bayviewbuurtwag het die verdagte nie weerstand gebied tydens arres nie.
Na bewering was daar bloed op sy hande sigbaar. Die verdagte is glo ook tydens die struweling lig beseer.
Die verdagte het reeds in die Mosselbaailanddroshof verskyn en bly in aanhouding tot sy volgende hofverskyning op 24 Oktober.
Kaptein Fourie het die buurtwag geloof vir hulle goeie werk en ook gesê dat dit weer eens bewys lewer van die effektiwiteit van 'n aktiewe buurtwag.
"Dit is kommerwekkend dat hierdie tipe misdaad helderoordag voorkom. Die publiek moet asseblief nie dink omdat dit daglig is, dat waaksaamheid verslap kan word nie. Moenie deure ongesluit laat nie. Selfs as jy in die tuin werk, moenie 'n kans waag en die deur na jou woning ooplos nie."
'n Saak van huisroof word deur ao Richard van Eyck van die Da Gamaskop-polisie se speurafdeling ondersoek.
Tydens die struweling het die verdagte die vrou herhaaldelik met die vurk gesteek. Hy het ook haar regteroor bykans afgebyt.