Herrie oor huise in Herbertsdale
Verskeie dorpenaars op Herbertsdale se drome van 'n eie huis het in frustrasie geëindig en verteenwoordigers van Mosselbaai-munisipaliteit moes vandeesweek die gemoedere ontlont.
In wat waarskynlik een van die eerste vergaderings was oor die behuisingskwessie, het 'n groep beswaarde inwoners hul misnoë met die bestaande behuisingskomitee, wat kwalifiserende begunstigdes vir die nuwe behuisingsprojek moes identifiseer, laat blyk. Onder meer het mnr Denovin Herandien en oud-raadslid Elvin Booysen aangevoer dat die gemeenskap nie deur die behuisingskomitee in hul besluite geken is nie.
Sou die probleme soos wat die groep besorgde inwoners, onder leiding van menere Herandien en Booysen nie die nodige aandag kry nie, het die gemeenskap gedreig om in protes op te ruk na die munisipale kantore.
Die munisipale afvaardiging, onder leiding van die speaker, raadsheer Petru Terblanche en die portefeultevoorsitter vir behuising, raadslid Cliffie Bayman, het vir sowat drie uur met die besorgde inwoners vergader en verskeie voorbeelde van beweerde ongerymdhede is gelug. Van die beweringe het ingesluit dat familie van die behuisingskomitee voorkeurbehandeling ontvang het, en dat inwoners wat reeds elders oor huise beskik, nogtans nou op Herbertsdale ook huise bekom het.
Ander probleme wat met onder meer die direkteur van beplanning en geïntegreerde dienste, mnr Carel Venter en mnr Colin Puren, die uitvoerende bestuurder in die kantoor van die munisipale bestuurder voorgehou is, is beweringe van swak vakmanskap.
Booysen het ook sy kommer uitgespreek oor die gebrek aan straatbeligting in die nuwe ontwikkeling, wat na sy mening veral veiligheidskwessies vir die nuwe inwoners meebring. Die munisipaliteit het gesê Eskom asook die politici dra kennis van die probleem.
Daar is ook beweer dat begunstigdes wat nie op Herbertsdale woon nie, bevoordeel is bo bestaande inwoners.
"Die verkose lede van die behuisingskomitee moes vasstel of die begunstigdes wat aansoek om die nuwe huise gedoen het, volgens wetgewing daarvoor kwalifiseer. Na ons mening het dit nie gebeur nie. Probleme is vantevore aan die munisipaliteit geopper," het Herandien benadruk.
Puren het met die besorgde gemeenskapslede ooreengekom dat 'n volledige lys van klagtes met die nodige bewyse daarvoor onverwyld aan die munisipaliteit voorgelê moet word. Sodra die klagtes dan ondersoek is, onder meer deur die relevante provinsiale departement, sal 'n terugvoervergadering belê word.