Plaaslike sakevrou skitter weer
Lorette Grobbelaar, bestuurder van Oliver Bande Mosselbaai en mede-eienaar van Supa Quick het die afgelope naweek ‘n besondere prestasie behaal.
In 2015 is sy aangewys as die South African Council for Business Women (SACBW) se sakevrou van die jaar in die korporatiewe afdeling.
Vroeër vanjaar het die organisasie Lorette genader om weer deel te neem, maar hierdie keer was die speelveld heelwat groter. Lorette moes meeding teen al die wenners van vorige jare.
Hierdie unieke kompetisie is geloods as deel van die viering van die 30ste bestaansjaar van SACBW. Die organisasie is passievol oor die ontwikkeling en bemagtiging van vroue in Suid-Afrika.
Deelnemers moes ‘n kort videovoorlegging doen om aan die beoordelaars te verduidelik hoe hulle ontwikkel en gegroei het sedert hulle die kompetisie gewen het.
Lorette sê sy het aanvanklik getwyfel of sy moes inskryf, omdat sy opgesien teen die onbekende ervaring om voor die videokamera te wees.
Haar aanvanklike onwilligheid ten spyt, is Lorette op 20 Oktober, tydens ‘n prestige gala-geleentheid in Pretoria as wenner van haar kategorie aangewys.
Lorette se video dra ‘n belangrike boodskap oor, nie net aan vroue in die sakewêreld nie, maar aan elke ervare persoon wat ‘n rolmodel vir ‘n jonger persoon is.
Hoe lyk die spore wat jy trap?
“Wat sal jý doen as jy in die middel van die nag ‘n oproep kry wat jou hele wêreld eensklaps tot stilstand ruk?”
Lorette vertel hoe sy vir baie jare lank net een voet voor die ander gesit het sonder om baie te dink oor wat sy doen of waarheen haar spore dalk lei. Toe haar man oorlede is na ‘n klein “roetine-operasie”, het dit vir haar gevoel of haar wêreld tot stilstand ruk.
Met besighede om te bestuur en twee jong seuns om groot te maak, sou dit seker te verstane wees as sy soos ‘n slagoffer gevoel het en wou wegkruip.
Lorette erken dat daar baie dae was wat sy wel gevoel het om dit te doen.
Sy sê, “Maar dan kom daar keuses na jou kant. Jy kyk na links en regs en moet besluit op watter paadjie jy gaan loop. Waarheen gaan jou spore lei?”
Om in vandag se omstandighede aan die stuur van besighede te staa, is ‘n groot uitdaging.
Lorette sê dat sy altyd steun op die goeie raad wat sy van haar mentors ontvang het wanneer dit voel of dinge te erg raak. Soos dié van wyle Oom Piet Snyman, die stigter en eienaar van die Oliver Groep. Wanneer sy ‘n krisis oor die telefoon met hom gedeel het, sou hy altyd sê, “Raak net eers rustig, dan neem jy beter besluite.”
Eendag, toe sy werklik raadop was, het hy vir haar gesê, “Loop altyd terug op die spore wat vir jou gewerk het.”
Haar eie pa, wat jare gelede oorlede is, het haar gereeld herinner, “Sussie, daar is nie iets soos ‘n hopelose situasie nie – daar is net hooplose mense.”
‘Gryp geleenthede aan’
Lorette sê sy is baie bly dat sy in 2015 haar moed bymekaargeskraap het om aan die kompetisie deel te neem.
Dit het baie nuwe deure vir haar oopgemaak.
Oliver Bande is in 2015 en weer in 2017 deur die Mosselbaai Besigheidskamer as die besigheid van die jaar aangewys. Mosselbaai Toerisme het ‘n 2015 ‘n toekenning vir uitenemende diens aan die besigheid gemaak.
Lorette word gereeld genooi om as spreker by verskeie geleenthede op te tree.
In 2016 het Oliver ook ‘n meganiese werkswinkel aangebou en drie maande gelede ‘n koffiewinkel op die perseel geopen.
Sy sê sy hoop dat sy nog vir baie jare die geleentheid sal hê om ander vroue in Suid-Afrika aan te moedig om diep spore te trap op hulle spesialisgebied.
“As jy in ‘n posisie is waar opkomende leiers jou dophou, moet jy seker maak jou spore lei na ‘n goeie plek. Gryp die geleenthede aan wat oor jou pad kom.”
Lorette se volledige video kan
‘Sussie, daar is nie iets soos ‘n hopelose situasie nie – daar is net hooplose mense.’
gesien word op YouTube deur Lorette Grobbelaar SACBW Winner op jou Google-soekenjin in te tik, of jy kan die skakel https://www.youtube.com/