‘Bestuurders’ opgelei by laerskool
St Blaize Primêre Skool se leerders word dalk die eerstes van ‘n nuwe generasie uiters bekwame voertuigbestuurders.
Dié skool is die eerste in die SuidKaap wat Vrydag, 19 Oktober ‘n junior verkeersopleidingsentrum (JTTC) ontvang het as deel van ‘n inisiatief van die nasionale departement van vervoer. Die JTTC-program word deur die direktoraat van padveiligheid bestuur namens die Wes-Kaapse departement van vervoer en openbare werke.
Die program het ten doel om deur middel van ‘n gesimuleerde omgewing, kinders op te voed aangaande padveiligheid sonder om hulle bloot te stel aan die gevare van werklike padtoestande.
Die program fokus tans op leerders in die grondslagfase, ten einde die kennis van aanvaarbare gedrag op die pad en die waardes van padveiligheid, goed te vestig.
Die eerste van hierdie soort sentrums, is in 1993 deur Lumalile Lakata, tans van die departement van vervoer en openbare werke, in Beaufort-Wes gevestig. Lakata, wat ook by die bekendstelling was, was voorheen verkeershoof op verskillende dorpe in die Wes-Kaap en het gedurende sy loopbaan verskeie inisiatiewe tot stand gebring met die oog op verbeterde padveiligheid.
Tydens Vrydag se bekendstelling van die projek, is leerders toegerus met draadkarre waarmee hulle op ‘n baan, geverf op die skoolterrein, aan ‘n verkeersimulasie moes deelneem. Hulle het meer geleer oor die padtekens en hoe om korrek daarop te reageer wanneer jy ‘n voertuig sou bestuur. Volgens die skoolhoof, mnr André Muller, is die baan beskikbaar vir alle skole en selfs kleuterskole in die omgewing om meer oor padveiligheid te leer.
“Ons sien baie uit om ander skole hier te verwelkom sodat hulle ook kan baat vind by die gebruik van ons sentrum ten einde die padveiligheid van ons kinders te verbeter,” sê mnr Muller.
Die volgende junior padveiligheidsentrum is glo vir ‘n skool in George geoormerk.
Rolspelers wat die bekendstelling van die projek moontlik gemaak het, sluit in die nasionale department van vervoer, die Wes-Kaapse departement van vervoer en openbare werke, die Wes-Kaapse onderwysdepartement, die Mosselbaaimunisipaliteit, Shazzzies Transport en Sanlam.