Suidgemeente hou verkoping
Die NG Suidgemeente hou op Saterdag, 3 November ‘n verkoping van tweedehandse klere en 'n witolifantegeleentheid waar artikels teen baie bekostigbare pryse te koop is. Die verkoping begin reeds om 08:00 en sal oop wees tot 11:00. Dit vind plaas in die kerksaal in 15de Laan, net langs die kerkgebou.
Enige gebruikte artikels - alles wat in ongebruik is en by ’n huis in ‘n kas of stoorkamer gebêre was - gaan hier te koop wees. Goeie tweedehandse klere, beddegoed en gordyne sal ook beskikbaar wees.
Daar sal ook ‘n gesellige teetuin wees waar geurige koffie, tee en koeldrank met koek, tert en soutigheid bedien sal word. Smullekker kitsetes en snoeperye sal ook verkoop word. "Kom kry sommer iets vir ontbyt of middagete en stap deur die saal miskien kry jy iets wat jy al lankal soek."
Laerskool Park gaan ‘n spesiale tafel met kinderklere hê.
Die fondse wat met die kinderklere geïn word, sal aangewend word om behoeftige leerders te help.
Navrae kan gedoen word by ds Danie Smit (044 691 1450 of 084 701 4386).