Kos, klank en kuier in Afrikaans in Hartenbos

Een ding waarmee alle Suid-Afrikaners saamstem is dat ons die heel lekkerste saamkuier wanneer daar kos en klank by is. Met die opening van Na Donker Koswerf gedurende 2018, het hierdie splinternuwe toevoeging tot ATKV Hartenbos se fasiliteite, reeds oornag ‘n groot gunsteling geword.

Na Donker is die perfekte plek van samekoms vir oud en jonk. Of dit nou 'n vinnige koppie koffie, ‘n damestee of 'n laatnagkuier is, die venue is perfek met ‘n gesellige uitleg, eg Afrikaanse atmosfeer en selfs 'n knetterende kaggelvuur vir daardie ekstra “iets”. Of jy nou kaalvoet in jou baaibroek of netjies uitgevat is, almal is welkom om die warm kuieratmosfeer te kom geniet.

KOS

Die Restaurant, Koswerf, bedien heerlike eg Suid-Afrikaanse geregte op 'n daaglikse basis. Die Sondag-buffet is reeds ‘n groot gunsteling en met die komende Kersseisoen, sal 'n Kersdag ete ook bedien word waarvoor daar so gou moontlik bespreek moet word. Alle spyskaart items word daagliks vars op die perseel voorberei deur gekwalifiseerde sjefs. Spesiale voorkeure soos vergetariese disse kan ook op versoek voorberei word. In die Dam, kan daar potjiekos gemaak word en natuurlik word daar gereeld gebraai. Daar is twee volledige kroeë met ‘n baie groot verskeidenheid wyn, bier en sterker dranksoorte. Die nuutste tendens van tapvat bier, wyn en ander alkoholiese verversings is ook beskikbaar en daar is selfs een van ons plaaslike wyne van Jakkalsvlei uit die gesogte kraantjie. Gereelde promosies asook wynpasproe met die spyskaart vind plaas. Boetiekbiere (craft beer) waarvan onder andere die plaaslike gunsteling Glenhoff, kan ook bestel word. Kitskoswerf is ‘n wegneem ete toonbank aan die buitekant van die gebou en die heerlikste chip en dips kan hier bestel word.

KLANK

Of jy nou kaalvoet in jou baaibroek of netjies uitgevat is, almal is welkom om die warm kuieratmosfeer te kom geniet.

Sedert die opening van Na Donker het gewilde Suid Afrikaanse kunstenaars reeds hier opgetree en meeste van die groot name wat gedurende Desember by die Amfiteater te siene sal wees, gaan ook hier optree. Plaaslike talent word egter genooi om deel te raak van die Na Donker-geleenthede waar opkomende kunstenaars se stemme en musiek gehoor kan word. Woensdagaande is karaoke aand en dan weergalm die berge soos daar gekuier en gesing word

Of jy nou ‘n koppie boeretroos (filter koffie met kondensmelk) of ‘n brandwyntjie wil geniet, Na Donker is dié plek om dit te kom doen.