Pieter Steenkamp skitter tydens Global Golf-borgdag
Oktobermaand se winderige toestande het tot dusver nie net die beste uit gholfspelers gehaal nie, maar ook het frustrasies by tye hoogty gevier. Woensdag, 17 Oktober was ‘n meer genadige dag en die 132 spelers wat aan Global Golf se maandelikse borgdag deelgeneem het, het van die aangenamer omstandighede gebruik gemaak en goeie tellings aangeteken.
Die bruto-wenner in die houespel kompetisie was Pieter Steenkamp (voorgee 5) wat slegs 70 houe nodig gehad het om die louere in te oes. Ten opsigte van die nettotellings het die manne mekaar behoorlik die stryd aangesê en ‘n wenner kon eers na die uittel bepaal word. Percy van Schalkwyk se 66 houe het sy jonger teenstanders na die uittel getroef. Jurgens Bosman en Skippie Scheepers het op 66 houe tweede en derde in die netto-afdeling geëindig. J Shelver, P Meyer, (albei 67 houe), asook M Hugo (68 houe) en M de Kock (69 houe) het ook die rooi tapyt betree om hulle duursame pryse by Arrie van der Linde van Global Golf te ontvang.
Saterdag
Die gewilde vierbal-alliansiekompetisie wat op Saterdag, 20 Oktober plaasgevind het, het ten spyte van die Curriebekerhalfeindstryde nog 144 spelers baan toe gelok. Die vierbalkombinasie van Kelvin Muller, Anthony Evertse, Ashwell Cameron en Clinton Windvogel het vrugte afgewerp en op 92 punte was hulle die wenners van die dag. Onder die bekwame, ervare leiding van die 84-jarige Colin Buck, het sy span bestaande uit Ian Wessels, Danie le Roux en Pieter Barnard op 89 punte tweede geëindig. As jy nog gedink het gholfspeel is vir die jonger garde, dan het die vier spelers ons verkeerd bewys, want hulle gesamentlike ouderdom is 314 jaar wat gemiddeld 78.5 jaar is. ‘n Veel jonger groep manne, Gerrit van Zyl, Jan Joubert, Gerhard Combrinck en Danie Lambrecht het ook 89 punte aangeteken, maar is na die uittel derde geplaas. Saterdag, 27 Oktober vind die eerste uitspeelrondte van die Kampioen van Kampioene plaas. Die kwalifiseerders se name is op die kennisgewingbord, so maak asseblief seker dat jy die ronde nie mis nie.