Sao Bras-onnie sing ‘n nuwe lied
Ronnie Lewis, die kuns- en kultuuropvoeder by Sao Bras Hoërskool, was in standerd 4 vir die eerste keer op die verhoog toe hy saam met sy ma gesing het. Sy pa, was 'n musiekonderwyser. Hy kon dus nie anders as om sy lewenspad so met die musiek saam te stap nie. Nie net kan dié man sing nie, maar vir instrumente bespeel staan sy hande ook nie verkeerd nie.
Ronnie het vandeesmaand sy eerste solo gospel-album bekendgestel. Alhoewel dit reeds die sesde CD-opname is waarby hy as musikant betrokke is, is hierdie poging vir hom die eindproduk van 'n persoonlike getuienis.
In Junie vanjaar, was Ronnie onderweg Genadendal toe om leerders wat met 'n kursus was te gaan haal. Hy het vroeg weggespring uit Mosselbaai, aangesien dit midde-in die tyd was waarin verkeer in en rondom Mosselbaai ontwrig is vanweë protesaksie.
Onderweg het dit begin reën.
"Ek het binne die spoedgrens gery, maar toe tref ek 'n stukkie padoppervlakte waar my motor van die pad af begin tol het." Ronnie se voertuig is afgeskryf na hierdie padongeluk.
Hy is in twee hospitale behandel waarna hy uiteindelik oorgeplaas is na die Life Bay View privaat hospitaal waar hy geopereer is. "Hierna het ek begin dink en besef - dis die derde aanslag van die Bose op my lewe en ek het net besluit dit kan nie so nie. Ek het besluit om God se goedheid in my lewe te celebrate." Die uiteinde hiervan is sy pas vrygestelde album.
Voorheen 'n lid van die suksesvolle a capella-groep, B Flat, is hierdie CD sy solo-poging. Ronnie rig ook met groot sukses kore af. "Die CD bestaan uit bekende geestelike liedere waarby ek my eie flavour gesit het."
Ronnie droom van 'n musiekopleidingsentrum, waar jongmense en ander belangstellendes nie net stemopleiding nie, maar ook opleiding in tegniese aspekte soos klankingenieurswese kan ontvang. "Ek wil graag instansies help deur musiek, soos om optredes te reël vir fondsinsamelings." Hy reken, heeltemal te gereeld is mense se talent onder die maatemmer. "Ek het gesien wat musiek doen, hoe aansteeklik dit is. Dis 'n magtige wapen om mense se gemoedstemming te bepaal." Dít is waarmee hy graag die gemeenskap wil bedien. "Eintlik gaan dit nie oor my of 'n solo-poging nie. Ek wou maar net die Here se hand vier in my lewe."