Toenemende kommer oor veiligheid by kruising

Danabaaiers beywer hul toenemend vir verbeterde veiligheid by die toegang na dié woonbuurt, meer so na die jongste kapingsvoorvalle van die afgelope naweek.

Jare reeds is die toegang na Danabaai, by die aansluiting van Floraweg by Louis Fourieweg, vir inwoners 'n kopseer. Hoewel dankbaar dat 'n addisionele, formele toegangspad volgens beplanning by die Herbertsdale-kruising sal aansluit, het besorgde inwoners weer eens kommer uitgespreek oor die toeloop van mense wat daagliks by die verkeerskruising saamdrom.

"Danabaaiers word afgestomp vir die veiligheidsrisiko wat die toeloop van mense by die verkeerskruising meebring. Wanneer 'n motoris mense in die pad opmerk, word té geredelik aanvaar dat dit werksoekers is, weinig dink dat dit dalk kapers of smash & grabbers mag wees."

Vorige voorvalle

Op 4 April verlede jaar moes 'n jong vrou nood-mediese behandeling ontvang na 'n voorval by die Danabaai-verkeerskruising.

Voor dit, op 4 Maart het twee voorvalle daar voorgekom.

By 'n openbare vergadering kort daarna, op 11 April, is die munisipaliteit egevra om die veiligheidsituasie by hierdie verkeerskruising dringend aan te spreek.

Vasgekeer

Benewens die brande van Desember 2016, was inwoners herhaaldelik ook vasgekeer en weens onluste in beide Junie en Julie vanjaar van die buitewêreld afgesluit.

By herhaalde openbare vergaderings sedertdien is die gevaarlike omstandighede by spesifiek die toegang toegelig.

Gesprekke is tot op die hoogste provinsiale vlak gevoer toe 'n afvaardiging van inwoners op 7 September vanjaar met die LUR vir Gemeenskapsveiligheid, minister Dan Plato en die adjunk provinsiale polisiekommissaris, genl maj Mpumelelo Manci samesprekings gevoer het.

Niks het gekom van die minister en generaal se ondernemings om persoonlik die kwellinge oor veiligheid gepas te eskaleer en om binne 'n maand amptelike terugvoer aan die gemeenskap te gee nie. Die Mossel Bay Advertiser het wel die minister se kantoor om opvolgkommentaar genader, waarop 'n gestandaardiseerde antwoord ontvang en berig is.

Groot groei

Danabaai beleef heelwat groei met heelwat nuwe ontwikkeling in die area. In 2017 is 84 planne vir nuwe huise goedgekeur; in 2018 tot op datum reeds 83. Hierbenewens is groot ontwikkelings soos die aftree/ leeftyloord knap voor Danabaai bydraend tot die verkeer op Floraweg wat van die aansluiting gebruik maak.

Heelwat stukwerkers, veral uit die Aslapark en KwaNonqaba-areas word deur Danabaaiers in diens geneem. Onvoldoende vervoer vir hierdie werkers na en van Danabaai bring mee dat inwoners geneig is om hul personeel by die verkeerskruising te gaan haal of af te laai.

Eweneens het die verkeerskruising in 'n oplaaisone vir kontrakteurs van buite Danabaai ontaard.

Hierdie samedromming bring verkeersveiligheidsprobleme mee aangesien mense willens wetens oor die pad na hul vervoer loop en voertuie onwettige U-draaie digby die verkeerskruising en voor aankomende verkeer maak.

Voorstelle

Verskeie voorstelle om die veiligheid by die kruising te verbeter is tydens herhaalde openbare vergaderings asook GOPvergaderings geopper.

Onder meer is versoek dat diegene Danabaaiers inkluis - wat by die kruising stilhou om mense op of af te laai, swaar beboet moet word. Die pleidooi was dat boetes as afskrikmiddel sal dien.

Daar is gevra dat die bestaande randstene alkant van Floraweg, wat tans toelaat dat voertuie op die skouer van die pad stilhou, met behoorlike skerp randstene vervang word om sodat voertuie nie op die padskouer kan aftrek nie. Die skouer van die pad behoort aan die munisipaliteit.

Versoeke is gerig dat die geen stilhoutekens, wat gevandaliseer of verwyder is, vervang moet word en dat innoverende maniere gevind word dat vandale die tekens nie weer kan beskadig of wegdra nie.

Inwoners het gevra vir behoorlike beligting, veral hoëmasbeligting by die verkeerskruising sodat die motoriste veral na donker behoorlik kan sien wat in die kruising gebeur.

Na aanleiding van die inisiatief deur die Mosselbaai-GPF om 'n Pan Tilt Zoom (PTZ) hoë-definisie kamera in die dorp op te rig, het Danabaaiers gevra dat dieselfde gehalte kameras by die verkeerskruising, maar ook elders in die buurt, geïnstalleer word.

Hoewel die grond direk naasliggend in privaatbesit is, het inwoners gevra dat dit vir 'n radius van minstens 50 meter om die verkeerskruising permanent ontbos moet word sodat kriminele makliker sigbaar kan wees wanneer voertuie die kruising nader.

Daar is ook al voorgestel dat gesprek met taxi-eienaars gevoer moet word vir meer voertuie op die roete na Danabaai.

Pad verlê

Inwoners is bekommerd dat die voorneme om die toegangspad mettertyd te verlê om by Crotzstraat aan te sluit, waarskynlik meebring dat geen inisiatiewe geneem word om die kruising te beveilig nie. Anders as by toegange na ander woongebiede in die groter Mosselbaai, is daar in die geval van Danabaai 'n bewese rekord van toenemende risiko wat wel aandag verg.