Mosselbaai GPF beste in Wes-Kaap
Die Mosselbaai-polisiestasie se gemeenskapspolisiëringsforum (GPF) is op Saterdag, 27 Oktober tydens die SA Polisie se provinsiale Prestige-toekennings as die beste GPF in die Wes-Kaap aangewys. Dié prestasietoekennings is daarop gemik om erkenning te gee vir uitnemendheid en prestasies in misdaadvoorkoming.Vervolgens sal die Mosselbaai GPF op nasionale vlak meeding om die nasionale toekenning. Voorsitter van die GPF, Leon van Dyk het met die Mossel Bay Advertiser gesels oor dié uitsonderlike prestasie.
Wat beteken die toekenning vir julle?
Dis 'n lekker erkenning vir die tydperk waarin ons aan 'n klomp goed gewerk het. Ons het 'n projekte wat begin gebeur, soos die perde op die strande, die beheerkamer en so aan. Die span wat ons aanboord het, is 'n goeie span. Elke ou vat 'n ding en hardloop daarmee en dinge is besig om te gebeur.
Wat is julle GPF se X-faktor?
Wat ons GPF uniek maak is die bepaalde doelwitte wat ons wil bereik. Ons bepaal wat vir ons belangrik is. Baie mense misbruik 'n GPF vir die verkeerde redes. Ek glo ook ons bedryf en bestuur ons GPF op 'n professionele wyse. Ons vra vrae aan onsself soos: wat is die uitsette wat ons verwag? Wat is ons begroting? Ons het besondere verhoudings. Dit is belangrik wanneer jy 'n GPF bedryf. Almal wat 'n rol kan speel, is aan boord, of dit nou die polisie of die nasionale vervolgingsgesag is, almal speel 'n rol.
Wat is die resep van 'n goeie GPF?
'n GPF moenie 'n talk shop word nie. Ek was ook 'n stasiebevelvoerder in my dae so ek verstaan waar die hulp nodig is en ek verstaan wat die polisie se behoefte is. Jy kan 'n GPF hê maar as jy nie samewerking het met jou groeperings nie, werk dit nie. Op Mosselbaai is elke lid van die buurtwag, lid van die GPF. Dit werk nie as 'n GPF teen die polisie werk nie. Natuurlik is daar probleme maar daar is ook baie gedoen om probleme uit te stryk en so word dit uitfaseer. Ons het dit vir ons makliker gemaak en ons omarm mekaar.
Wat is nog belangrik?
Die houding van die polisie en die GPF moet reg wees en die bevelvoerder speel 'n belangrike rol. Die bevelvoerder hier op Mosselbaai maak sy deure vir ons oop. Die toekenning is 'n voertuig vir almal om te besef daar kan soveel meer gedoen word as almal saamwerk. As jy 'n talk show-GPF het gaan jy nie inwoners hê wat dit gaan bywoon nie, die mense woon die vergaderings by om te hoor wat jy gedoen het aan die probleme, nie om net te praat oor probleme nie. By ons is daar tot 35 rolspelers, wat kerke en skole en buurtwagte insluit, as jy die medium reg gebruik kry jy almal se insette oor gemeenskaplike probleme. Die forum bespreek nie net polisiegoed nie, dit bespreek probleme wat almal raak.
Dit kom daarop neer dat die GPF moet prioritiseer want verskeie goed is vir verskeie ouens belangrike. Daar moet 'n gemaklike medium wees oor wat die doelwitte is. In die verlede was dit altyd ons (die GPF) en julle (die polisie) toe die konsep begin het, en ek dink dit is wat lt kol Albert Haggard hier reg doen. Hy kies nie net nie sommer 'n kant nie en hy kom op vir sy personeel se belange, hy staan by hulle, maar hy maak seker die verhoudings bly 100% in plek, nie vir die of daardie rede nie, maar sodat almal vorentoe kan beweeg en ons doelwitte kan bereik en verandering kan sien gebeur.
Jy kan ‘n GPF hê maar as jy nie samewerking het met jou groeperings nie, werk dit nie.