Misdaadstatistieke: digitale bankdienste
Die Suid-Afrikaanse Bank Risikoinligtingsentrum (SABRIC) het onlangs die jongste digitale bankdienste misdaadstatestieke bekendgemaak.
Volgens SABRIC het daar in 2017 ongeveer 13 438 misdaadinsidente deur middel van aanlyn- en mobiele bankdienste plaasgevind.
Die finansiële verlies het in totaal meer as R250 000 000 beloop.
Hierdie jaar, vanaf Januarie tot Augustus, is daar alreeds ‘n styging van 64% in misdaadinsidente, maar die verliese gely is slegs 7% meer as verlede jaar oor dieselfde tydperk.
Insidente deur mobiele bankdienste het ‘n toename van 100% getoon, met verliese van R23 593 631. Insidente deur middel van aanlynbankdienste toon ‘n toename van 44% met verliese van R70 156 364. In 2017 is 4040 onwettige SIMomruilings gedurende die Januarie- tot Augustusperiode gerapporteer. Hierdie jaar staan die aantal gerapporteerde SIMomruilings oor hierdie periode alreeds op 8254, meer as dubbel!
Kalyani Pillay, die hoof uitvoerende beampte van SABRIC, noem dat banke werklik tegnologies alles in hulle vermoë doen om voordurend aanlyn- en mobiele bankdienste beter te beveilig.
Om hierdie rede fokus kuberskelms al meer daarop om menslike swakhede, hul gebrek aan digitale geletterdheid en hul agtelosigheid uit te buit. Sy
beklemtoon dat hierdie kuberskelms voordurend beter en meer gevorderde sosiale ingenieurstegnieke gebruik om hul slagoffers te flous en sodoende persoonlike en vertroulike inligting te bekom, byvoorbeeld gebruikers IDs en wagwoorde vir bankdienste.
SABRIC gee die volgende raad aan gebruikers van aanlyn- en mobiele bankdienste.
Aanlynvisvang:
• Moet nooit klik op skakels of ikone in e-posse, wat kwansuis van die bank kom nie.
• Moet nooit reageer op enige van hierdie eposse nie, vee dit onmiddellik uit.
• Tik altyd die URL-adres van jou betrokke bank in op jou internet leser wanneer jy aanteken vir aanlyn bankdienste.
• Maak altyd seker jy teken aan op jou bank se ware webblad en nie op ‘n vervalste een wat jou gebruikers ID en wagwoord gaan "steel" nie.
• Kyk altyd uit vir die groen gesluitde slot langs die URL-adres van die bank.
• Kies ‘n moelike wagwoord vir aanlynbankdienste.
• Onthou, ‘n bank sal nooit jou gebruikers ID en/of wagwoord telefonies of per e-pos vra nie.
Volgende keer gee ek meer van die raad wat SABRIC aanbeveel aan gebruikers van aanlynbankdienste.
Enige leser wat enige nie-tegniese vrae het omtrent veiligheid in die kuberwêreld, is welkom om my te kontak by rossouw. vonsolms@gmail.com.
* Prof Rossouw von Solms is 'n emeritus professor en lid van die Sentrum vir Navorsing in Inligting en Kubersekerheid aan die Nelson Mandela Universiteit.