Skenk ‘n skooltas vir 2019
Honderde behoeftige graad 1's wat 12 jaar gelede landwyd ten volle toegeruste skooltasse ontvang het, gaan volgende jaar matriek toe.
“Sonder ’n tassie en skryfbehoeftes in graad 1 sou matriek dalk nooit vir van dié kinders moontlik gewees het nie,” sê die Afrikaanse sanger Riana Nel, wat ’n ambassadeur is van Solidariteit Helpende Hand se Skooltassieprojek.
Nagenoeg R1,7 miljoen is nodig om te sorg dat 5 000 behoeftige graad 1's in 2019 hand-aan-hand met hul skoolmaats hul skoolloopbaan betree. Die inhoud van die tassies sluit onder meer die volgende in: ’n boekie met Bybelstories, uitdraaikryte, 'n legkaart, inkleurpotlode, grys potlode, 'n liniaal, 'n skerpmaker, 'n skêr, 'n uitveër, gom, pennesakkies en penne. Die waarde van die tassie met sy inhoud is ongeveer R380. “Ek is ‘n skrywer, kunstenaar en digter. Ek doen ook grafiese ontwerp, skets en skilder. My kreatiewe loopbaan en bestaan het by ’n potlood en kryte begin, wat ek bevoorreg genoeg was om van my ouers af te kon ontvang,” sê Nel.
“Ek is ’n ambassadeur vir die Skooltassieprojek want iets so klein soos ’n potlood, gepaard met geloof, kan ’n groot inpak op ’n lewe hê en ’n kind se kreatiwiteit aanwakker.
Hannes Noëth, besturende direkteur van Solidariteit Helpende Hand, sê die Skooltassieprojek is een van dié liefdadigheidsorganisasie se “malste projekte” wat tans bedryf word. “Uit ‘n sakeoogpunt maak dit regtig finansieel nie sin om so baie geld op een projek te spandeer nie,” sê Noëth. “Die druk is soms groot om die projek te stop en die R1,7 miljoen vir iets anders aan te wend. Mense vra ook hoekom ons nie goedkoper tasse vir die graad 1's opmaak nie, maar ons wil seker maak elke kind kry net die beste wat hy of sy verdien, net soos hul maatjies wat meer bevoorreg is. Niemand mag uitstaan nie,” voeg hy by.
Die publiek wat Helpende Hand wil ondersteun in dié projek, kan die woord TASSIE SMS na 38969. SMS’e kos R10. Of besoek helpendehand. co.za/skooltassie om ’n skenking te maak.