Tarkafees onder die loep geneem
Tydens 'n gemeenskapsvergadering beroep deur die Mosselbaaimunisipaliteit aangaande die toekoms van die Tarka Straatfees, is besluit dat 'n komitee voortaan die hand van James Malgas, wie se breinkind die fees is, sal sterk.
Colin Puren, uitvoerende bestuurder - strategiese dienste by die Mosselbaaimunisipaliteit, het die byeenkoms op Dinsdagaand, 30 Oktober gelei. Raadslede Erika Meyer, Venolea Fortuin en Marulyn Kannemeyer het ook die byeenkoms in die El Shaddai Baptiste Kerk, Tarka bygewoon.
Tydens die bespreking is genoem dat daar verder met die voorgestelde begroting gekom sal word, indien die fees daarop fokus om meer van plaaslike talent gebruik te maak, in plaas daarvan om kunstenaars van buite Mosselbaai en omgewing te bring.
Puren het tydens die vergadering dit duidelik gestel dat die munisipaliteit, as 'n borg en ook logistieke ondersteuner van die fees, 'n hoogs gereguleerde organisasie is en te alle tye rekenskap van hulle betrokkenheid moet kan gee. Vandaar die voorstel dat 'n komitee saamgestel moet word wat vir die aanbied van die fees verantwoordelik sal wees, in plaas van 'n individu, soos dit in die verlede was. Hy het dit duidelik gestel dat die Mosselbaai-munisipaliteit met die belê van die gemeenskapsvergadering, juis daarop gefokus het om hulle konstitustionele plig teenoor die gemeenskap na te kom.
Puren het Malgas geloof vir sy inisiatief en goed uiteengesette aanbiedings en begrotings wat die fees betref, maar het terselfdertyd die noodsaaklikheid van die stig van 'n komitee uitgestip juis om die aanbiedinge by die fees verder uit te brei.
Malgas het tydens sy spreekbeurt die ontstaan van die fees belig, asook die belang daarvan om dit te ontwikkel tot 'n langtermynprojek waarby lede van die Tarka-gemeenskap finansieel kan baat vind.
Verskeie lede van die gemeenskap het Malgas se betrokkenheid by die fees vurig ondersteun en gesê dat hulle baie sterk voel oor hoe en wat by die fees aangebied moet word.
Raadslid Venolea Fortuin het tydens haar bydrae gesê dat 'n amptenaar van die munisipaliteit op die feeskomitee sal moet dien, vanweë die borgskapooreenkoms. Sy het ook uitgelig, dat die Tarka Straatfees tans die enigste fees in Mosselbaai is wat in 'n spesifieke woonbuurt gehou word, en deur die Mosselbaai-munisipaliteit ondersteun word.
Die voorgestelde datums vir die fees is vanaf 20-23 Desember.