Tannie Magdalena van Mosselbaai word 104 jaar oud
Tannie Magdalena (Daleen) Nieuwoudt wat in Onse Rus-ouetehuis op Mosselbaai bly, het op Sondag, 4 November 104 jaar geword.
Sy is tans waarskynlik die oudste persoon in die Mosselbaai-omgewing.
Die Mossel Bay Advertiser het tannie Nieuwoudt op Vrydag, 2 November gaan besoek.
Opmerklik wanneer 'n mens haar ontmoet is haar lewensvreugde en dankbaarheid. Sy sê sy het geen spesifieke geheime om te deel aangaande haar langslewendheid nie. “Dis my Here wat dit gedoen het. Ek is baie dankbaar."
Sy is dankbaar teenoor die personeel by Onse Rus vir alles wat hulle vir haar doen. “Dankie ook aan my kinders.
“Toe ek hulle aangespreek het oor goed waarvan ek nie hou nie, was hulle nooit lelik met my nie.”
Sy het drie kinders, 'n seun in Beaufort-Wes, 'n dogter in Kleinbaai en nog 'n seun in Mosselbaai.
Tannie Daleen kan nog steeds loop en sy lees graag biblioteekboeke in gewone druk, nie grootdruk nie.
Sy sê sy het geen pyne in haar liggaam nie. Boonop dink en praat sy helder en duidelik.
Haar gunstelingkos is boerekos. Sy eet gesond en geniet groente en vrugte.
Dis duidelik dat die Onse Rus-inwoners baie van tannie Daleen hou. Toe die Mossel Bay Advertiser daar was, het hulle rondom haar gestaan en vir haar soentjies en drukkies gegee.
Hulle het ook liedfderyk stories en grappies oor haar vertel. Tannie Daleen het op 'n skaapplaas in Hanover in die Karoo grootgeword. Sy het van perdry gehou en as volwassene, was sy die NG Kerk-orrelis op Hanover.
Sy het orrel- en klavierlesse gegee. Haar man is 'n hele paar jare gelede oorlede. Die burgemeester, raadsheer Harry Levendal, het ook die verjaarsdagviering op 2 November bygewoon. Hy het 'n groot bos blomme in 'n mandjie, ook gevul met ander verrassings vir haar gegee. Hy het gesê dat dit 'n voorreg is om haar te kon besoek. "Baie dankie vir jou aangenaamheid. Ek sal dit nooit vergeet nie," was haar antwoord.
Ken jy iemand wat ouer as 104 jaar is? Stuur 'n e-pos aan lindas@groupeditors.co.za of skakel die Mossel Bay Advertiser se kantoor (044 690 7156).