Administrateur se bedanking ‘n kopseer
Die Eden-sportraad veg om uit ‘n doodloopstraat te kom om een van SuidAfrika se beste sportadministrateurs, Dave van der Walt wat op dié sportraad dien, te vervang.
Van der Walt het Donderdag, 7
Junie tydens die Eden-sportraad se algemene jaarvergadering na 44 jaar as sportadministrateur sy bedanking as sekretaris van die sportraad ingedien. Die Eden-sportraad se bestuur is onbestrede herkies tydens die jaarvergadering, met Van der Walt wat ingestem het om aan te bly tot ‘n geskikte nuwe sekretaris aangewys is.
Tot op hede is geen nominasies ontvang om dié sportlegende se amp te vul nie.
Verskeie vergaderings is intussen belê in ‘n poging om iemand te identifiseer, maar alle pogings was onsuksesvol.
Op Donderdag 25
Oktober is die kwessie tydens ‘n ledevergadering indringend bespreek.
Van der Walt wat tydens die afgelope Mosselbaai Sport- en Rekreasiefees se afrigterskonferensie aan die Mossel Bay Advertiser gesê het hy gaan op Maandag, 1 Oktober kantoor oppak, maar hy bly lojaal teenoor die sportraad en sport opsigself. Sodoende was hy tydens 25 Oktober se vergadering steeds in die sportraad se sekretarisstoel. Tydens dié vergadering het hy aangedui dat hy tot einde 2018 sal aanbly om die bestuur en lede ‘n verdere kans te gee om sy pos te vul. Die bestuur moes met opsies vorendag kom.
Daar is bespiegel dat die sportraad fondse moet soek om die pos ‘n betaalde amp op die sportraad te maak.
Van der Walt dien onbetaald in die pos. Van der Walt se lojaliteit teenoor sport word so hoog geag, dat toe dit voor die Junie-vergadering bekend word dat hy gaan bedank, die visevoorsitter van die Wes-Kaapse departement sport en kultuur, Bennett Bailey besluit het om ter ere van Van der Walt uit Kaapstad na George te reis om die vergadering by te woon.
Hy het Van der Walt geloof vir sy onbaatsugtige diens as sportadministrateur. “Dave van der Walt is een van my mentors in my sportloopbaan.
Hy is ‘n lojale en hardwerkende sportadministrateur,” het Bailey gesê.